Almaty memlekettik Qýyrshaq teatryndaǵy Momynjanovtar otbasyn áriptesteri syrtynan «mıllıoner otbasy» dep ázildeıdi. Áıtpegende she, bir kásip, bir teatr, bir orta, bir otbasy ortaqtastyrǵan erli-zaıypty ártisterdiń ekeýi de talantty, ekeýi de eńbekqor. Otaǵasy Bolat Momynjanov elimizdiń mádenı keńistiginde rýhanı qundylyqtardy dáriptep júrgen úzdikterge beriletin «Sahnager» Ulttyq teatr baıqaýynyń júldegeri bolsa, jubaıy Ulbosyn Teatr qaıratkerleri odaǵynyń «Eńlikgúl» syılyǵyn jeńip alǵan. Teatr ónerindegi talantty ártisterge beriletin eń joǵarǵy syılyqty mıllıon teńgemen birge enshilegen ekeýi sodan beri óz ortasynda «mıllıoner otbasy» atanyp ketti.
Bolat ta, Ulbosyn da 2000 jyly J.Elebekov atyndaǵy Estrada jáne sırk kolledjiniń «qýyrshaq janry ártisi» mamandyǵyna oqýǵa birge qabyldanady. Serik Maqulbekovtiń sheberhanasynda shyńdalǵan qyz ben jigit kolledjdi támamdaǵan soń shańyraq kóterýge sheshim qabyldaıdy. 2003 jyly Sultanǵalı Shúkirovtiń buıryǵymen respýblıkalyq Qýyrshaq teatryna ártis bolyp qabyldanǵanymen, bir jyl ótpeı-aq «sanany turmys bılegen» kezeńniń tarshylyǵyn Bolat ta bir adamdaı tartyp, teatrdy tastaýǵa májbúr bolǵan edi. On eki myń teńgege otbasyn asyraý qıyndyq týdyrǵan soń, amal joq, teatrdaǵy taza jumysyn Almaty armatýra zaýytyndaǵy qarapaıym jumysshylyqqa aıyrbastap, qýyrshaqtarmen qosh aıtysyp kete barady. Qala shaǵyn aýdandaryndaǵy kópqabatty úılerdiń birazynda qolynyń izi qalǵanyn Bolat búginde kúlip eske alǵanymen, shynyqtyryp, shymyr etip shyǵarǵan ol ómir mektebin akter eshqashan umytpaq emes. Esesine, jas bosanyp otyrǵan Ulbosyn eriniń izin ala, qundaqtaýly bóbegin aýyldaǵy ata-enesine tabystap, dál osy teatrǵa jumysqa qabyldanady.
Boıǵa daryǵan óner uzaq buǵyp jata almaıdy. Qudaı syılaǵan qasıettiń qalaıda bulqynyp, buzyp-jaryp shyǵatyn bir mezeti bolady. Álde saǵynysh, álde namys báribir jetektep ákelip sol uly muratpen qaıta tabystyrady. Kópqabatty úılerdiń qurylysynda júrip Bolat osyny túsindi. «V teatre «Sezam» horosho» degen qyzyldy-jasyl jarnamany qulaǵy shalǵanymen kóz toqtatyp qaramaǵan eken, Jańa jyl qarsańynda jumysy hanbazardaı qaınap, bir aı boıy tynbastan balalarǵa naǵyz merekelik óner jár- meńkesin usynatyn «Sezam» teatry shaqyrǵanda, sahnany saǵynyp, qulazyp júrgen Bolat oılanbastan qurylys alańynan tike osynda tartty. «Sezamnyń» úzeńgisine aıaǵynyń ilingeni sol, taıaq tastam jerde bir kezde óziniń tusaýyn kesip, týǵan úıindeı bolǵan jyly uıasy – Qýyrshaq teatry qushaǵyn ashyp, qol bulǵap turdy...
Kishkentaı kórermendi qýantý, áserge bóleý túkke turmaıtyn tirlik, jaı ǵana óner degen adam qatelesedi, baldyrǵandardyń babyn bilý, onyń tanymyna laıyq tilmen janyn baýrap, tańyrqatý – óte qıyn jumys. «Bular ne túsinedi deısiń?» dep róline júrdim-bardym qarap, daıyndyqsyz sahnaǵa shyqqandy anımeniń alýan túrin kórip adam bolyp kele jatqan kishkentaı baldyrǵandar bir ret te keshire almaq emes. Tilin burap tálpishtene sóılep, qýyrshaqty qımyldatsa boldy, bala esi shyǵa qýanyp sala beredi degen keshegi túsinik kelmeske ketti. Sebebi búgingi qýyrshaqtardyń túri de, turpaty da basqa. Endeshe búgingi qýyrshaq teatry ártisiniń jumysy da keshegiden kúrdelirek, ózgeshe arnaǵa aýysqan. Keıipkeriniń daýysyn, qımylyn dál keltirý óz aldyna, spektakldiń basynan aıaǵyna deıin oqıǵaǵa baılanysty qýyrshaqty ilestire júrgizý ońaı sharýa emes. Qýyrshaqty qozǵalysqa keltiretin jipti on saýsaǵynyń ár býynyna orap alyp, olardy shatystyryp almaı, at bolyp shaýyp, onyń ústindegi adamyna án saldyryp, oǵan qosa qas-kirpigin oınatyp, ol az bolsa, atynyń tizesin búktirip, qulatyp, qaıta turǵyzyp, bir mezgilde birneshe qımyl jasatyp, qýyrshaqqa jan bitirý úshin erekshe talant kerek. Bolatty rejısser Juldyzbek Jumanbaı sahnalaǵan belgili ónertanýshy Erkin Jýasbektiń «Toba» atty spektaklindegi mysyqtyń rólinen kórgenimizde, ártistiń qııaly júırik, sheberligi myqty bolsa, kez kelgen maqulyqtyń minezimen adam janyn áserge bólep, jamannan jırentip, izgilikke úıretýge bolady eken-aý dep oı túıgenimiz esimizde.
Bolattyń mysyǵy, aıyby maqulyq demeseń, arnaıy sóz etýge turatyn aıryqsha obraz. Bul obraz árdaıym úlken býyn kórermenniń kóz aldynda turatyn «Prostokvashınodaǵy» úsheýdiń qyzyqtary týraly áıgili keńestik mýltfılmdi eske salady. Súıkimdi balanyń janyndaǵy úı sharýasyna uqypty mysyqty umytý múmkin be? Gazet ákep, esik qaqqan poshtashy Pechkınge «bul kim?» degen bir suraǵyn bes qaıtalap qoıyp, aıaǵynda taldyryp túsiretin kishkentaı torǵaıdyń janyndaǵy Matroskın degen pysyq mysyqtyń daýysy qulaqta máńgi jattalǵan. Sondaǵy mysyqtyń sózin Oleg Tabakov deıtin orys kınosynyń eń myqty akteri dybystaǵanyn keıin bildik, alaıda mynaý Bolattyń qazaqsha saırap turǵan mysyǵynyń Tabakov dybystaǵan sol tarǵyldan bir mysqal kemdigi bolsashy?! Ǵaıyptan taıyp bir qudirettiń kúshimen mysyq bitkenge til bitip, adamsha tirlik etýdi bastasa, olar sózsiz Bolattyń minsiz keıipteýindegi aıaǵyn jaı basyp kerilgen montany, ıesine erkeleýdi jaqsy biletin, óz-ózine kóńili tolǵan toqmeıil minezdi mysyqqa uqsar edi. Bolat osy obrazymen-aq balalyq shaǵyn saǵynǵan adamdy Qýyrshaq teatryna yntyq etip, kelesi sahnalyq qoıylymǵa yqylaspen oralýǵa mindettep qoıǵanyn ózi de bilgen joq. Mysyqtyń rólimen-aq Momynjanov teatrdyń talaı júldesin jeńip alyp, qýyrshaqtyń qudiretti kúshke ıe óner ekenine kópshilikti sendirip júr.
Qýyrshaq teatrynyń ártisi bolýdyń óz ereksheligi bar. Jıi shaqyratyn Qýyrshaq teatrynyń sahnasyndaǵy spektakldi tamashalap otyryp «jansyz qýyrshaqtyń oıynyna eki sanyn shapaqtap shattanatyn balany osynshama kól-kósir áserge bóleıtin ne qudiret?» degen suraqty jıi qoıýǵa týra keledi. Aqyry tapqandaı da boldyq. Qýyrshaqtyń jany – qýyrshaq júrgizýshi ártistiń qolynda eken. О́ıtkeni sahnada matadan tigilgen, temirden ıilgen, aǵashtan jonyp jasalǵan túrli qýyrshaqty qımyldatyp, sóıletip turǵan qara kıimdi úlken adamnyń múlde baıqalmaıtynyn, biraq kórermenniń bar zeıini janyndaǵy adamǵa emes, qýyrshaqqa ǵana aýatynyn talaı ret ańdadyq. Bul sirá, qýyrshaq júrgizýshiniń múmkindiginshe qarapaıym ári shynaıy qozǵalys jasaǵan sheberligine baılanysty bolýy kerek. Ártis qýyrshaqty basqarmaıdy, kerisinshe, onymen birigip, birtutas beınege aınalyp ketedi. Bolat beınelegen Sotqar buzaý, Aladdın, Kashtanka, orys ertegilerindegi tolyp jatqan qasqyr, eshki, átesh, baqa, arystan, kerik sekildi ań-qustyń rólderi osy sózimizge dálel. Bolat búginde talaı jylǵy tájirıbesin shákirt tárbıeleý isine arnap, T.Júrgenov atyndaǵy Ulttyq óner akademııasynan jańadan ashylǵan «Qýyrshaq bólimi» kafedrasynda sabaq júrgize bastady.
Akter aldymen ózin shyńdap, ónerin shyn jetildire alsa ǵana sheberligin qýyrshaqqa bere alady. Jaratylys zańy sondaı, ómirde de ár adamnyń bolmysyna zer sala qaraǵanda, onyń júzinen áldebir janýardyń, ańnyń, qustyń sulbasy eles berip, boıynda osylarǵa tán minezdiń buǵyp jatatynyn baıqaýǵa bolady. Bir adamnyń tabıǵatyna qoıannyń qorqaqtyǵy tán, biri túlki sekildi aılaker, biri aıbarly arystannyń minezimen kósh bastap, taǵy biri jan-jaǵyn jylan sekildi zahar tilimen jaıpap jatady. Bir adam jylqy minezdes, biri tyshqan keıiptes. Adam boıyndaǵy osy qasıettiń bári Qýyrshaq teatrynda alaqanǵa salǵandaı anyq kórinis tabady, sebebi sahnada jarqyraı kórinetin osy shyndyq, eń aldymen, Bolat pen Ulbosyn sekildi akterlerdiń sheberliginen týyndaıtyny ras.
Burynǵydaı emes, búgingi Qýyrshaq teatrynyń baǵyty, taqyryby tutas ózgerip, ýaqyt talabyna oraı kópqyrly, san salaly qyzmet atqara alatynyn aıqyn dáleldep otyr. Zaman suranysyna saı qýyrshaqtar da erte «eseıip», balalarǵa ǵana emes, barlyq jastaǵy kórermenge tartymdy bola tústi. Qazir Almaty Qýyrshaq teatrynyń repertýarynda balalar spektaklderinen bólek, keshki mezgilde oınalatyn «+18» mártebesindegi dramalyq qoıylymdar kóbeıip keledi. «Medeıa», «Romeo men Djýletta», «Makbet» sııaqty jańashyl teatr rejıssýrasymen sahnalanǵan spektaklderde de Bolat basty rólderde oınap, dramalyq janrda da qamshy saldyrmaıtyn dara júıriktiń ózi ekenin kórsetti. Iаson, Makbet sekildi tereń psıhologızmge qurylǵan kúrdeli róldi kásibı drama ártisterinen bir mysqal kem oınamaǵan Bolatty mundaı amplýada qýyrshaq ártisi dep eshkim oılamaıdy da.
Bolattyń ómirdegi jary, tórt balasynyń anasy Ulbosyn Momynjanova da teatrdyń óte talantty, besaspap ártisteriniń biri. Qaı rólde oınasa da ıkemdiligimen, eptiligimen daralanyp turady. Ulbosynnyń anımatorlyq qyry da áriptesteri arasynda ábden moıyndalǵan. Spektakl kezinde balalardy sahnadaǵy oıynǵa tartyp, olardy eliktirip, ınteraktıvti qarym-qatynas ornatýdyń sheberi. Eki tildi erkin meńgergen, únemi shyǵarmashylyq izdeniste júretin Ulbosyn balalarǵa arnalǵan oryssha, qazaqsha spektaklderdiń barlyǵynda belsendi jumys jasaıdy. «Qyzyl telpek», «Suǵanaq eshki», «Úsh toraı», «Sotqar buzaý», «Atameken», orys halyq ertegilerinde Masha, túlki, mysyq, «Arystannyń úreıin qalaı emdeımiz» qoıylymynda Bongo-Tongo, «Aladdınniń sıqyrly shamynda» jyn bolyp, kótergen taqyryby, ıdeıasy ártúrli ertegilerde balǵyn kórermenderdiń oı-qııalynyń durys qalyptasýy úshin baryn salady.
Qýyrshaq teatry sahnasynyń serkeleri bolsa da, maqtandy jany qalamaıtyn, betegeden bıik, jýsannan alasa bolýdy ómir súrý ustanymyna aınaldyrǵan Bolat pen Ulbosyn qarapaıym, kishipeıil minezben-aq kóp is tyndyryp, kózqarasy men tanym kókjıegi endi qalyptasyp kele jatqan jas óskindi adamgershilikke tárbıelep, olarǵa durys ómir súrýdiń qundylyqtaryn úıretý úshin jantalasa eńbek etýden esh jalyqqan emes. Osyndaı talantty ártister jasaǵan obrazdan bir balanyń júregine izgilik dáni egilip, qoǵamǵa qyzmet etetin jaqsy adam bolyp qosylsa, bul Qýyrshaq teatrynyń teńdessiz jeńisi bolmaq.