Bul týraly Úkimet otyrysynda QR Energetıka mınıstri Maǵzum Myrzaǵalıev aıtty, dep jazady Egemen.kz.
Mınıstrdiń aıtýynsha, energııa óndirýshi uıymdardyń otyn úshin aýqymdy kredıtorlyq bereshegi mańyzdy másele bolyp otyr.
«Osy jyldyń 10 qyrkúıeginde «QazTransGaz-Aımaq» mekemesi aldyndaǵy bereshek 757 mln teńgeni quraıdy. Sondaı-aq energııa óndirýshi uıymdardyń «Bogatyr-Kómir» kásiporny aldynda jalpy somasy 2, 629 mlrd teńge bereshegi bar», dedi Maǵzum Myrzaǵalıev.
Sonymen qatar mınıstr elektr stansalarynda otyn jınaqtaý jalǵasyp jatqanyn málimdedi.
«Qoımalarda 3,5 mln tonna kómir jáne 90 myń tonna mazýt jınaqtalǵan. Bul jalpy bekitilgen normalarǵa sáıkes keledi. О́ńirlerge jetkiziletin «áleýmettik mazýtqa» qatysty aıtatyn bolsaq, 2021 jyldyń tamyzynda Energetıka mınıstrligi kúzgi-qysqy kezeńde áleýmettik-óndiristik nysandar men mekemelerge mazýt jetkizý kestesin bekitti. Soǵan sáıkes mazýttyń kólemi 195,5 myń tonna boldy», dedi mınıstr.