Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik basqarý deńgeıleri arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly» QR zańynyń jobasy ekinshi oqylymda maquldandy, dep habarlaıdy Egemen.kz.
«Atalǵan zań jobasy memlekettik basqarý júıesin odan ary jetildirý maqsatynda ázirlengen. Osy zań jobasy bıyl 2 maýsymda birinshi oqylymda maquldandy. Zań jobasymen jumys jasaý barysynda depýtattar mynalardy kózdeıtin túzetýler engizdi: Úkimettiń tamaq ónimderiniń qaýipsizdigi salasyndaǵy jáne sý sharýashylyǵy salasyndaǵy jekelegen ókilettikterin saqtaýy; agroónerkásiptik keshendi damytý salasyndaǵy ýákiletti organnan janýarlar dúnıesin qorǵaý, molaıtý jáne paıdalaný salasyndaǵy organǵa asyl tuqymdy balyq ósirýdi damytý boıynsha quziretter berý; aýdıtorlyq qyzmet, býhgalterlik esep jáne qarjylyq eseptilik salalaryndaǵy ruqsat berý rásimderin júrgizý boıynsha, sondaı-aq aerotúsirilim jumystaryn júrgizý jónindegi normalardy naqtylaý. Buǵan qosa, jekelegen normalardy naqtylaıtyn jáne zań jobasynyń mazmunyn jaqsartatyn túzetýler engizildi», dedi zań jobasyn tanystyrǵan Májilis depýtaty Jambyl Ahmetbekov.
Onyń atap ótýinshe, zań jobasy boıynsha 172 túzetý kelip tústi. Olar jumys tobynyń 18 otyrysynda, komıtettiń keńeıtilgen otyrystarynda múddeli memlekettik organdarmen, qoǵamdyq uıymdardyń ókilderimen qaraldy.
«Májilistiń barlyq komıteti zań jobasy boıynsha oń qorytyndy berdi. Osyǵan oraı zań jobasyn tutastaı maquldap, QR Parlamenti Senatynyń qaraýyna jiberýdi usynamyz», dedi ol.
Májilis depýtaty zań jobasyn biraýyzdan maquldap, qujat Senat qaraýyna jiberildi.