Mádenıet jáne sport mınıstrliginiń qoldaýymen elimizde alǵash ret memlekettik áleýmettik tapsyrys sheńberinde «Jas qalamger» oqytý mektebi óz jumysyn bastady.
Áleýmettik joba oqý saýattylyǵyn arttyrý, jas daryndardyń tanymdyq-shyǵarmashylyq belsendiligin damytýdy maqsat etip otyr.
Bastamany «Qazaqstannyń jastar konventi» qory júzege asyrady. Aldaǵy ýaqytta oqytý mektepterinde elordadaǵy orta jáne arnaýly orta oqý oryndarynyń 10-18 jas aralyǵyndaǵy daryndy balalary ádebıet salasynyń dramatýrgııa, poezııa, proza baǵyty men «Ǵylym tap = Find science» (Abaı shyǵarmalaryn aǵylshyn tilinde oqytý), «О́leńge árkimniń-aq bar talasy» atty taqyryptar boıynsha dáris alady.
Osy oraıda 8 qyrkúıek kúni Nur-Sultan qalasyndaǵy Abaı Qunanbaıuly atyndaǵy №87 mektep-gımnazııasynda jobanyń resmı ashylý rásimi ótip, oǵan ustazdar men oqýshylar, ata-analar qatysty.
Oqytý mektebine qatysýshy balalarǵa aqyn Nesipbek Aıtuly, jazýshy-dramatýrg, Memlekettik syılyqtyń laýreaty Roza Muqanova, aqyn, fılologııa ǵylymdarynyń doktory Janat Áskerbekqyzy, fılologııa ǵylymdarynyń kandıdaty, aıtysker-aqyn Serikzat Dúısenǵazy, abaıtanýshy-jýrnalıst Ernat Melsuly jáne taǵy basqa aqyn-jazýshylar dáris oqıdy.
Joba aıasynda bıyl 10 tamyz ben 5 qyrkúıek aralyǵynda qabyldanǵan ótinishter nátıjesinde jobaǵa 200-ge jýyq bala qatysatyny belgili boldy. Oqytý mektebi 8-20 qyrkúıek aralyǵynda ótedi.