QR Prezıdenti Qasym-Jomart Toqaev XVII Eýrazııalyq medıaforýmǵa qatysýshylardy quttyqtady, dep jazady Egemen.kz.
Qazaqstan Respýblıkasynyń Memlekettik hatshysy Qyrymbek Kósherbaev forýmnyń ashylýy kezinde Qasym-Jomart Toqaevtyń quttyqtaýyn oqydy.
«XVII Eýrazııa medıaforýmyna kelgenderińizge qýanyshtymyn. 19 jyl ishinde ol bizdiń eldegi jáne búkil aımaqtaǵy jetekshi medıa-platformaǵa aınaldy. Bul shara dástúrli túrde talantty jýrnalıster men medıa menedjerlerdi, belgili saıasatkerler men bedeldi sarapshylardy jınaıdy. Al forýmda talqylanatyn máseleler aýqymy buqaralyq aqparat quraldarynyń sheńberinen áldeqaıda keń», dep jazylǵan quttyqtaýda.
«Jan-jaqty jahandyq transformasııa, irgeli ózgerister, áleýmettik prosester kezinde ýaqyt yrǵaǵyna ilesip, eń ózekti máselelerdi ashyq talqylaý jáne sheshimderdi birge tabý burynǵydan da mańyzdy. Koronavırýs daǵdarysynyń bastalýymen búkil álemde halyqtyń sapaly aqparatqa degen suranysy artyp, jalǵandyq aqparatpen kúreske qajettilik týyndady. Forým osy baǵyttaǵy úrdister men tásilderdi talqylaýǵa tamasha múmkindik beredi», dep atap ótti Prezıdent.
Qasym-Jomart Toqaevtyń aıtýynsha, jańa shyndyq medıa salasy úshin jańa mindetter qoıady. Sıfrlandyrý prosesi edáýir jedeldedi. Aýdıtorııanyń qalaýy men ádeti tez ózgerýde, aqparatty usynýdyń jańa formaty paıda bolýda, áleýmettik jeliler transformasııalanyp jatyr.
«Men bul máseleni kásibı túrde talqylaý buqaralyq aqparat quraldarynyń damýyna jańa serpin beretinine senimdimin. El táýelsizdiginiń 30 jyldyǵyna arnalǵan sessııa da baı bolatynyna senimdimin. Birizdi ózgeristerdiń qazaqstandyq joly men halyq birligin saqtaýdyń biregeı tájirıbesi erekshe nazar aýdarýǵa laıyq. Memleketimizdiń strategııalyq baǵytynyń mańyzdy quramdas bóligi - ashyq dıalog pen jan-jaqty seriktestik», dedi Memleket basshysy óziniń quttyqtaýynda.
«Osyǵan oraı, forým qazirgi zamanǵy medıa trendterdi túsinýge ǵana emes, sonymen qatar halyqaralyq formattaǵy yntymaqtastyq kókjıegin keńeıtýge yqpal etedi dep aıtýǵa bolady. Qazaqstan árqashan konstrýktıvti kún tártibin ilgeriletýge múddeli jáne barlyq salada, sonyń ishinde buqaralyq aqparat quraldary men shyǵarmashylyq ındýstrııada birlesken jobalardy júzege asyrýǵa daıyn», dep qorytyndylaǵan Qasym-Jomart Toqaev medıaforým qatysýshylaryna jemisti jumys pen sáttilik tiledi.