Bıyl Eýrazııa dalasyn qanǵa boıaǵan Uly Otan soǵysynyń bastalǵanyna 80 jyl tolyp otyr. Fashıstik Germanııa shabýyl jasaǵanda eshkim bul soǵys baqandaı tórt jylǵa sozylyp, Keńes Odaǵynyń qaramaǵynda ómir súrip jatqan 26 mıllıon adamnyń ómirin qııady dep oılamady. Maıdan dalasyna Qazaqstannan 1 mıllıon 366 myń adam attanyp, olardyń 602 myńy elge oralmaǵan.
Qanquıly qyrǵynda qaza tapqan soǵys qurbandaryna taǵzym retinde Almaty qalasynda bir top jastar ortalyq zıratta tazalyq jumystaryn júrgizdi. Beıresmı derekterge qaraǵanda munda 500-deı soǵys ardageri jerlengen. «Máńgilik Qazaqstan» qoǵamdyq qory qyzmetkerleri men «Eriktiler lıgasy» tobynan quralǵan jastar beıitterdiń aınalasyn qoqystan tazalap, shóbin ordy.
Joba jetekshisi, polkovnık, ardager Muhamedjan Ábdibekovtiń aıtýynsha batyrlardyń erligi jadymyzda máńgi saqtalýy tıis. «Bul aksııanyń aty «Eshkim de, eshteńe de umytylmaıdy» dep atalady. Biz osy kúni Ekinshi dúnıejúzilik soǵysqa saq zamanynda, Qobylandynyń zamanynda bolǵan oqıǵa sııaqty qaraıtyn boldyq. Alaıda bul surapyl maıdan keshe ǵana bolǵan. Tarıh úshin qas-qaǵym sát. Qany áli keýip úlgergen joq» deıdi ol.
Aksııaǵa qatysyp júrgen jastardyń biri Abzal. Ol qaladaǵy kolledjderdiń birinde oqıdy. Ardagerlerdiń qadir-qasıetin ardaqtaý úshin ol da búgin dostarymen birge tazalyq jumystaryn júrgizýge keldi. «Bıyl 3-kýrsqa óttim. Jylda osynda kelip tazalyq aksııasyna qatysyp turamyn. О́zimniń atam Belarýs maıdanynda kóz jumǵan. Beıiti sonda. Munda jatqan kisiler de atam sııaqty soǵys kórgen kisiler ǵoı» dep óz oıyn ortaǵa saldy Abzal.
Aıta keteıik, bul aksııa Almaty qalasy Qoǵamdyq damý basqarmasynyń «Azamattyq borysh» jobasy aıasynda iske asyryldy.
ALMATY