Túrik kompanııasy Aqtaý qalasyna jerasty qoqys konteınerin syıǵa tartty, dep habarlaıdy, Egemen.kz.
Alǵash ret ornatylǵan jerasty konteıneriniń birneshe artyqshylyqtary bar. Máselen, qalanyń estetıkalyq kelbeti jaqsaryp, jaǵalaý aımaǵyndaǵy týrızmniń damýyna oń áserin tıgizedi. Qala turǵyndary men qonaqtarynyń demalýyna da qolaıly bolmaq. О́ıtkeni, konteınerlerden qolaısyz ıis shyqpaıdy jáne arnaıy tehnıkamen shyǵarý kezde qoqys jan-jaqqa tógilmeıdi.
«Aqtaý qalasyna kelgenime 2 jyldan asty. Ásem qalada eski konteınerdiń turǵanyn kórip, kompanııanyń atynan osyndaı jerasty qoqys jáshikterin syıǵa tartýdy sheshtim. Kórshi elder arasyndaǵy yntymaqtastyq nyǵaıa bersin», dedi kompanııa dırektory Álı Delıbýdak.
Sonymen qatar, zamanaýı konteınerdiń kólemi qazirgi qoldanystaǵy qoqys jáshikterinen úlken. Bul óz kezeginde reıster sanyn azaıtyp, qoqys shyǵaratyn mekemeler úshin tıimdi bolmaq.
Qala ákiminiń orynbasary S.Gýsmannyń aıtýynsha jańa úlgidegi qoqys konteınerin ornatý jóninde qalalyq máslıhattyń kezekti sessııasyna usynys berilmek.