QR Sybaılas jemqorlyqqa qarsy is-qımyl agenttiginiń prevensııa qyzmeti basshysynyń orynbasary Ǵanıjan Asanuly málim etkendeı, sybaılas jemqorlyq táýekelderin taldaý kezinde 600 mln teńgeniń qoldanylmaı jatqan planshetteri men dári-dármektiń baǵasyn jasandy kóterý densaýlyq saqtaý mınıstrliginiń eki komıtetinde anyqtaldy, dep habarlaıdy Egemen.kz.
«О́zderińiz biletindeı, pandemııa densaýlyq saqtaýdyń kóptegen máselelerin, sonyń ishinde sybaılas jemqorlyqqa jol ashty. Bul densaýlyq saqtaý salasyndaǵy sybaılas jemqorlyq táýekelderin syrtqy taldaý sıklyn bastaýǵa negiz boldy», dedi Asanuly.
Ol ótken jyly áleýmettik medısınalyq saqtandyrý qory men densaýlyq saqtaý mınıstrliginiń ortalyq apparaty taldaýmen qamtylǵanyn eske saldy. Bıyl mınıstrliktiń 2 komıtetinde, atap aıtqanda, Medısınalyq jáne farmasevtıkalyq baqylaý komıteti, Sanıtarlyq-epıdemıologııalyq baqylaý komıtetinde tolassyz syrtqy tekserýler aıaqtaldy.
Onyń aıtýynsha, 138 sybaılas jemqorlyq táýekeli anyqtaldy, olar boıynsha 246 usynym ázirlendi.
«Birinshi, «Maqsattyq kórsetkishterdiń jetilmegendigi». Nysanaly ındıkator – «naýqastardyń medısınalyq kómek sapasyna qanaǵattanýy» nátıjeleriniń burmalanýynyń joǵary táýekeli belgilendi. Ekinshi, dári-dármektiń baǵasyn jasandy túrde kóterý. Baǵa ótinim berýshiniń dáıeksiz aqparatyna nemese onyń kommersııalyq usynysyna qalyptastyrylady. Dári-dármekterdiń baǵasyna olar bolmaǵan kezde de marketıngtik shyǵyndar kirýi múmkin. Qoldanystaǵy kóterme-bólshek saýda erejeleri baǵany qosymsha 30%-ǵa arttyrýǵa múmkindik beredi. Tórtinshi. Sanıtarlyq-epıdemıologııalyq qyzmettiń baqylaý-qadaǵalaý fýnksııalaryndaǵy qaýipter», dep túsindirdi prevensııa qyzmetiniń basshysy.
Agenttiktiń derekteri boıynsha, medısınalyq qyzmetterdiń sapasyna syrtqy saraptama nátıjeleriniń zańsyzdyǵy anyqtaldy. Máselen, 147 tekserý táýelsiz sarapshylardyń qatysýynsyz júrgizildi, al saraptamalyq qorytyndylardy ýákiletti emes adamdar jasaǵan.
Monıtorıng jáne kameraldyq baqylaý sıfrlandyrylmaǵan. Bul baǵytta qabyldanyp jatqan sharalar formaldy. Satyp alynǵan planshetter men mobıldi prınterler (quny 600 mln teńge) ákimshilik praktıkany avtomattandyrý úshin paıdalanylmaıdy. Baqylaý qujattary qolmen jasalady, bul sybaılas jemqorlyqqa jaǵdaı jasaıdy.
«Joǵaryda atalǵan sybaılas jemqorlyq táýekelderi boıynsha usynystar jasalyp, Densaýlyq saqtaý mınıstrligine joldandy», dep túıindedi Asanuly.