AQSh Gaıtıden kelgen 10 myńnan astam mıgrantty otanyna qaıtarady, dep jazady Egemen.kz.
«Habar 24» jazýynsha, Meksıkamen shekaralas Tehas shtatynda qazir 10 myńnan asa bosqyn bar. Ásirese keıingi aptada adam sany kóbeıgen. Olar teńiz arqyly shekarany zańsyz kesip ótkender. Qazir kópir astyn panalap nemese qoldan jasalǵan shatyrlarda turyp jatyr.
Bılik olardy tamaqpen qamtamsyz etýge tyrysqanymen, sý jáne azyq-túlik tapshylyǵy týyndap, sanıtarlyq talaptar buzylǵan. Endi AQSh bıligi Gaıtı azamattaryn keri qaıtarý úshin kúnine on shaqty áýe saparyn uıymdastyrady.
«Bul adamdar 4-5 aı júrip, áreń degende AQSh-qa jetti. Keıbireýler jarty jolda kóz jumdy. Qıyn jaǵdaıdan qashyp kelip otyrǵanda, amerıkalyqtar olardy keri qaıtarmaqshy. Mıgranttardy AQSh sııaqty derjava qabyldamasa, Gaıtı bıigi qaıtyp kelgen azamattardyń jaǵdaıyn jetistire qoımas», dedi Haitian Bridge Alliance qaýymdastyǵynyń ókili Gerlın Iozef.
Negizi, Donald Tramp tusynda AQSh-ta kóshi-qon erejeleri qatańdatylǵan. Alaıda bılik basyna Djo Baıden kelgeli kóbiniń kúshi joıyldy.
Sońǵy aqparat boıynsha, keıingi 11 aıda AQSh-qa Gaıtıden 29 myń mıgrant kelgen. Olardyń deni – 2010 jylǵy alapat zilzaladan keıin Ońtústik Amerıkanyń ózge elderine bas saýǵalaǵan azamattar.