Demalys kúnderi fýtboldan Qazaqstan Premer-lıgasynyń 21-týr oıyndary ótti. Kópshilik nazary osy kezeńde Taraz ben Nur-Sultan qalalarynda ótken kezdesýlerge aýdy. Sebebi, osy matchtarda jeńiske jetken komandalarǵa jarys kestesinde jeke-dara kósh bastaýǵa múmkindik týyndaǵan edi.
Kúni búginge deıin kósh bastap kele jatqan «Tobyl» Tarazǵa sapar shegip, jergilikti klýbpen kúsh synasty. Qos komanda 90 mınýt boıy bir-birimen tireskenimen tablodaǵy esep esh ózgergen joq – 0:0. Esesine «Astana» óz múmkindigin qalt jibermedi. Olar óz alańynda «Aqtóbeni» qabyldady. Bir qyzyǵy, bul básekedegi úsh gol da 20-mınýtqa deıin soǵyldy. 4-mınýtta Fatos Bechıraı mergendik tanytsa, 12-mınýtta Maksım Fedın 11-metrlik núkteden múlt ketti. 15-mınýtta Marın Tomasov ekinshi dopty qaqpaǵa engizdi. 19-mınýtta Dmıtrıı Korkıshko esep aıyrmashylyǵyn qysqartty – 2:1. Bul esep oıynnyń sońyna deıin saqtaldy. Osy jeńisiniń arqasynda «Astana» el birinshiliginde qaıta kósh bastady. Qazirgi kezde elordalyq fýtbolshylar 47 upaıdy enshilep otyr. Al basty qarsylasynan bir upaıy kem «Tobyl» ekinshi oryndy ıelenýde.
Qalaı da «Astana» men «Tobyldy» alysqa uzatpaýdy kózdep otyrǵan «Qaırat» bul joly «Qyzyljardy» utty. Biraq bul jeńis ońaılyqpen kelgen joq. Soltústik Qazaqstannan kelgen komanda almatylyqtarǵa ájepteýir qarsylyq kórsetti. Tek 77-mınýtta ǵana Artýr Shýshenachev nysanany dál kózdep, Qurban Berdyevtyń komandasyna jeńis syılady – 1:0. Qorjynynda 40 upaıy bar «Qaırat» úshinshi oryndy ıemdenýde.
Taldyqorǵannyń «Jetisý» men Oraldyń «Aqjaıyǵy» arasyndaǵy matchta teń esep tirkeldi – 2:2. Túrkistannyń «Turany» men Shymkenttiń «Ordabasy» da qansha jantalasqanymen bir-birin ala-almady – 1:1. Aqtaýdyń «Kaspııi» óz alańynda áýpirimdep júrip, «Atyraýdan» aılasyn asyrdy – 2:1. Qyzylordada «Qaısar» Qaraǵandynyń «Shahteryna» ese jiberdi – 1:2.
Jarys kestesiniń joǵarǵy jaǵynda kimder baryn aıttyq. Al tómengi satylarǵa keler bolsaq, «Jetisýdyń» jaǵdaıy óte múshkil. Taldyqorǵandyqtar 12 upaımen kósh sońynda keledi. «Qaısar» da qýanatyndaı jaǵdaıda emes. Syr boıynyń fýtbolshylary 15 upaıdy enshilep, 13-oryndy qanaǵat tutýda.