Meksıkada Gýanahýato shtatynyń ortalyq bóligindegi Salamanka mýnısıpalıtetinde belgisiz bireýler meıramhana mańynda jarylys jasap, eki adam qaza tapty, tórteýi jaralandy, dep jazady Egemen.kz.
Jarylys meıramhana lyq toly bolǵan kezde jasalǵan. Zardap shekkender aýrýhanaǵa jatqyzyldy. Aımaq gýbernatory Dıego Valeho jarylysty terrorızmge teńedi.
«Bul shtatta buryn-sońdy bolmaǵan lańkestik shabýyl. Ol aımaqtyń buryn bastan keshkenderimen salystyrǵanda, zorlyq-zombylyq deńgeıin arttyrǵany sózsiz», dedi ol.
Prokýratýranyń málimetinshe, belgisiz adamdar qoldan jasalǵan jarylǵysh zat salynǵan býmany meıramhana menedjerine tapsyrǵan. Paket ashylǵan kezde jarylys bolyp, eki adam qaza taýyp, tórt adam aýyr jaraqat alǵan. Qadaǵalaý agenttiginiń sheneýnikteri bolǵan oqıǵanyń ártúrli nusqasyn qarastyryp jatyr. Negizgileriniń birine sáıkes, qastandyqqa osy aımaqta áreket etetin uıymdasqan qylmystyq toptyń biri jaýapty bolýy múmkin.
Gýanahýato sońǵy jyldary Meksıkadaǵy eń qaýipti shtattardyń birine aınaldy. Qańtar men shilde aralyǵynda munda 2,1 myńǵa jýyq qasaqana kisi óltirý tirkeldi. Sáýirde Meksıkanyń «Qoǵamdyq qaýipsizdik pen qylmystyq ádilet jónindegi azamattyq keńes» úkimettik emes uıymynyń sarapshylary respýblıkanyń 18 qalasyn álemdegi eń qaýipti 50 qalanyń tizimine engizdi. Birinshi oryndy Gýanahýatodaǵy Selaıa qalasy aldy.