Shymkent qalasynda tirek-qımyl apparaty men kórý qabileti nashar sportshylar arasynda VI Spartakıada bastaldy, dep jazady Egemen.kz.
Jarysqa elimizdiń óńirlerinen 300-den astam sportshy qatysyp jatyr.
Baǵdarlamaǵa sáıkes qatysýshylar doıby, shahmat, toǵyzqumalaq, parakarate jáne arbada bıleý syndy paralımpıadalyq emes sport túrlerinen synǵa túsedi. Doıby jarysy «64» jáne «100» oıyndary boıynsha 7 týrdan turady. Oǵan elimizdiń 17 óńirinen 80-nen astam sportshy qatysady.
Al shahmattan ótetin synda 16 óńirden kelgen sportshylar baq synaıdy. Jarysta kórý qabileti nashar jáne tirek-qımyl apparaty zaqymdanǵandar úshin bólek top qurylǵan. Sonymen qatar toǵyzqumalaqtan 15 óńirdiń ókili synǵa túsedi.
Para-karate 22 qyrkúıekte Shymkent qalasyndaǵy joǵary sport sheberligi mektebiniń sport zalynda ótedi. Jarysqa Nur-Sultan, Shymkent qalasynyń jáne Atyraý, Aqtóbe oblysynyń sportshylary qatysady.
Sporttyq merekeniń sánine aınalǵan arbada otyryp bıleý saıysy kombı erkin, kombı eýropalyq, kombı latına, kombı frıstaıl, dýo, dýo latına, dýo frıstaıl, sıngl jáne sıngl frıstaıl syndy 10 nomınasııa boıynsha uıymdastyrylady. Oǵan 50-den astam sportshy qatysady. Atalǵan bı jarysy «Túrkistan Saraıy» mádenıet úıinde, ústel oıyndary «Kórme» ortalyǵynda ótedi.
«Aıta keteıik, Spartakıada úsh kezeńnen turady. Áýeli aýdan, keıin qala men oblysta jáne qorytyndy týr respýblıkalyq deńgeıde ótedi. Spartakıada maqsaty – ulttyq qurama komandalaryna daryndy sportshylardy irikteý. Jarys qorytyndysy boıynsha jeńimpazdar men júldegerler Mádenıet jáne sport mınıstrliginiń atynan dıplom, medal jáne arnaıy kýbogimen marapattalady», dep jazady vedomstvonyń baspasóz qyzmeti.