Áskerlerdi tekserý aıasynda «Oımasha», «Kóktal», «Shyǵys» jáne «Saryshaǵan» polıgondaryna Áýe qorǵanysy kúshteriniń maıdandyq, áskerı-kóliktik jáne armııalyq avıasııa ekıpajdary jumyldyryldy, dep habaralaıdy Egemen.kz QR Qorǵanys mınıstrligine silteme jasap.
Áskerı utqyrlyqty arttyrý maqsatynda arnaıy maqsattaǵy bólimshelerdiń jeke quramy, qarý-jaraq pen áskerı tehnıka 3000 shaqyrymnan astam aımaqqa jiberildi. Kúshter men quraldardy alys jerlerge jiberýge áskerı-kóliktik avıasııa ushaqtary paıdalanyldy.
Áýe qorǵanysy kúshteriniń áskerı bólimderi men bólimsheleri jedel áýeaılaqtardan jaýyngerlik is-qımylǵa daıyndalý jáne oǵan kirisý máselelerin pysyqtaıdy. Áýeaılaqtary joq aýdandarda ár túrli áýe kemeleriniń ushýy men qonýyna múmkindik beretin kólik joldarynyń áýeaılaq ýchaskeleri qoldanylady.
Kaspıı teńiziniń sý aılaǵyndaǵy Toqmaq múıisiniń jaǵalaýynda S-295 áskerı-kóliktik ushaqtary 3000 jáne 5000 metr bıiktikten arnaıy maqsattaǵy jasaqty túsirýdi júzege asyrdy. Armııa avıasııasynyń ekıpajdary Mı-35M soqqy berýshi tikushaqtarynyń oq atyp shabýyldaý tásilimen arnaıy maqsattaǵy bólimsheleriniń desant túsirýin júrgizdi.
Maıdandyq avıasııanyń ekıpajdary zymyran áskerlerimen jáne radıoelektrondyq kúres quraldarymen ózara is-qımyl jasap, qarsylastyń nysandaryna soqqy jasady.
Tekserýge Sý-30SM, Sý-27 kópfýnksıonaldy joıǵyshtary, S-295 áskerı-kóliktik ushaǵy jáne Mı-35M, Mı-17, Mı-8, Mı-171Sh, ES-145 tikushaqtary jáne ushqyshsyz ushý apparattary jumyldyryldy.