Elorda ákimi Altaı Kólginov Nur-Sultan theatre week halyqaralyq teatr festıvali ótetinin habarlady.
«Ekpe alǵan turǵyndar sanynyń kóbeıýi men KVI-ge qarsy ujymdyq ımmýnıtettiń qalyptasýy qalypty ómirge birtindep oralýǵa múmkindik beredi. Sanıtarlyq normalardy saqtaı otyryp, 28 qazan men 1 qarasha aralyǵynda Nur-Sultan theatre week halyqaralyq teatr festıvalin ótkizýdi josparlap otyrmyz. Elordamyzdyń barlyq teatry qatysady, sondaı-aq sheteldik teatr ujymdary shaqyrylady», dedi qala ákimi.
Festıvaldi ótkizýge alǵash ret qalanyń barlyq ınfraqurylymy, onyń ishinde shaǵyn jáne orta bıznes atsalyspaq. Teatr aptalyǵy kezinde kórme, teatr sahnasynyń jetekshi teatrlary men metrleriniń túrli sheberlik sabaqtary uıymdastyrylyp, qala turǵyndary arasynda premeralarǵa bıletter oınatylady.
«Byltyr qazaq drama teatryna jańa ǵımarat berildi, endi saıabaǵyn abattandyramyz. Buǵan deıin «Astana Opera» teatrynyń qasynda emen baǵy, «Astana balet» teatry janynda baq jasaldy. M.Gorkıı atyndaǵy akademııalyq orys drama teatryna restavrasııalyq jóndeý jumystary júrgizildi», dedi ákim.
Sondaı-aq qala basshysy bıyl Jastar saraıy men Jas kórermender mýzykalyq teatry arasyn jalǵaıtyn «Teatr býlvary» men elordadaǵy alǵashqy Demalys Promenade jaıaý júrginshiler kóshesi ashylǵanyn aıtty.