Halyqaralyq fýtbol federasııasy (FIFA) Vengrııa quramasyn rasızm úshin jazalady, dep jazady Egemen.kz.
Býdapeshtte ótken 2022 jylǵy álem chempıonatynyń irikteý matchynda Vengrııa jankúıerleri brıtandyq qara násildi oıynshylarǵa maımyldyń daýsyn salyp aıqaılaǵan. Sondaı-aq aǵylshyn qaqpasyna dárethana qaǵazyn laqtyrǵan. Jankúıerlerdiń qysymyna qaramastan, aǵylshyndar 4:0 esebimen jeńdi.
Oıynnan keıin Ulybrıtanııa Premer-Mınıstri Borıs Djonson jankúıerlerdiń áreketin synap, FIFA-ny qatań shara qoldanýǵa shaqyrdy.
Federasııa sheshimimen Vengrııa quramasy aldaǵy eki kezdesýin jankúıerlersiz ótkizedi. Sonymen qatar 200 myń frank aıyppul tóleýge mindetteldi.
«FIFA násilshildik pen zorlyq-zombylyqtyń kez kelgen túrine, sondaı-aq kemsitýshiliktiń nemese qorlaýdyń kez kelgen basqa túrine múldem tózbeýshilik týraly naqty ustanymǵa ıe», dep jazylǵan federasııanyń saıtynda.