Tokar mamandyǵyn ıgerip, dańqqa bólengender arasynda qazaq jumysshylary neken-saıaq. Kúni boıy zaýytta daryldaǵan stanoktyń basynda turyp, zyryldap jatqan beltemirdi joný ońaı jumys emes. Jońqanyń biri – sál qalyń, biri – sál juqa bolyp ketse ónim sapasyz shyqty deı ber. Osyndaı mashaqaty kóp mamandyqty ıgerýge erik-jiger kerek. Alaıda bul mamandyqty qazaq jastary da ıgerip alǵan. Solardyń biri – qyzyljarlyq Satan Maqanov. Ol bul iste úlken tabysqa da jetip júr.
Ol 16 jyl buryn Petropavldaǵy Kırov atyndaǵy zaýytqa úshinshi razrıadty tokar bolyp qabyldandy. Jas jigit ol kezde óziniń ómir joly osy kásiporynmen jalǵasady degenge senbegen. Zaýyttyń shýy oǵan kóp ýaqyt jat bolyp júrdi. Alaıda kúnnen-kúnge óz kásibine degen súıispenshilik oıandy. Keıde kúndiz jonyp, tıisti kólemin keltire almaǵan temir bilikti túsinde jonyp, shtangen-sırkýlmen eseptegende dál shyǵaryp jatady. Sosyn ertesine qulshyna kirisip, keshegi keltire almaǵan bólshekti týra jonyp shyǵady. Mundaıdyń da óz qyzyǵy bar eken.
Ujymda eńbekqor jas óziniń úlken bedelge ıe bola bastaǵanyn da sezine bastaıdy. Jumystan shyqqan boıda sportzalǵa júgirip, bokspen aınalysqan ony salıqaly áriptesteri keıbireýler qusap arzan kafelerge nemese qýys-qýysty panalap, «sharshaǵandy basamyz» degendi syltaýratyp ashy sýǵa áýestengender qatarynda bolmaǵany úshin de qatty syılaıtyn. Erinbegen eńbektiń alǵashqy nátıjeleri de sport jaǵynan kórine bastaıdy. Qalalyq jáne oblystyq jarystarda birneshe dúrkin jeńimpaz boldy. Al 2017 jyly jumysshylar arasynda ótken halyqaralyq «Rıng koroli» jarysynda birinshi oryn alyp, kásiporynnyń dańqyn kóteredi. Odan ári óziniń negizgi kásibi boıynsha da bıik tabystarǵa qol jetkize bastady. «Qazaqstan ınjınırıng» kompanııasynyń 10 jyldyǵyna oraı ótkizilgen konkýrsta «Úzdik tokar» atalymyn jeńip aldy.
Kásibı sheberligin de shyńdap, osy jyldarda altynshy razrıadqa deıin kóterildi. Qazir Satan Maqanov eń kúrdeli degen tokarlyq operasııalardy erkin meńgergen, zaýyttaǵy bedeldi sheberlerdiń biri. Eseli eńbegi de ataýsyz qalmaı, kásiporyn ákimshiliginiń, kásipodaqtyń túrli alǵystary men syılyqtaryn alǵan. Oblys ákimi Qumar Aqsaqalovtyń da Qurmet gramotasymen nagradtaldy. Byltyr respýblıkalyq kásipodaqtar federasııasynyń «Eńbek dańqy» ordenimen marapattaldy. Marapatty tapsyrǵan oblystyq kásipodaqtary ortalyǵynyń tóraǵasy Erik Nuraqaev jas jigittiń aldaǵy alar asýy bıik bolatynyna senim bildirdi. «Satan sııaqty eńbekqor, aıqyn maqsaty bar jastardyń bolashaǵy zor bolatynyna senimdimin. Eshqandaı kóldeneń tabys pen jeńil aqshaǵa alańdamaı, óz isine berik bolǵan jandar ǵana bıik tabysqa jete alady», dedi ol.
Satan Maqanovtyń ózi ómirde uıań, biraq ishki qýaty berik ekeni sezilip turady. Jubaıy ekeýi úsh bala tárbıelep otyr. «Bizdiń eńbek ujymymyz jaqsy. Túrli jaqsy isterge bastaıtyn jigitter aramyzda kóp. Solardyń biriniń aqylymen qystygúni ózenge túsýmen de aınalysyp júrmin. Bul adamnyń boıyn titirkendirip, uzaq ýaqytqa sergitetin aıryqsha jattyǵý. Qazir ony da meńgerip aldym. Bir kezde ıogamen de aınalysqanmyn», deıdi jalyndy jigit.
Osyǵan qarap «jigitke jeti óner de az» degen maqaldy eske alasyz. Adam tolyq azamat bolýy úshin de bir ónerden ekinshisine umtyla berýi kerek qoı. Biz onyń bıik armandary men maqsattarynyń oryndala berýin tiledik.
PETROPAVL