Shymkent qalasynyń áýejaıynda jeke derekterdi rastaý úshin eGov mobile qosymshasy arqyly sıfrly jeke kýálikti paıdalanýǵa bolady. Buǵan deıin mundaı qyzmet Nur-Sultan, Almaty jáne Aqtóbe qalalarynyń áýejaılarynda qoljetimdi bolatyn.
Indýstrııa jáne ınfraqurylymdyq damý mınıstrliginiń baspasóz qyzmetiniń málimetinshe, áýejaıda sıfrly jeke kýálikti paıdalaný úshin eGov mobile qosymshasynda avtorlandyrylǵan paıdalanýshy «Sıfrly qujattar» bólimine kirip, tizimnen jeke kýálikti tańdaý qajet. Áýejaıdyń tirkeý bóliminde, sondaı-aq ushý aldyndaǵy tekserýden ótý kezinde servıste jasalǵan QR-kody bar smartfonnyń ekranyn kórsetý qajet.
Ishki reısterde sıfrly jeke kýálikti paıdalaný múmkindigi Indýstrııa jáne ınfraqurylymdyq damý mınıstrligi, Sıfrlyq damý, ınnovasııalar jáne aeroǵarysh ónerkásibi mınıstrligi, «Qazaqstannyń avıasııalyq ákimshiligi» AQ, otandyq áýe kompanııalary men áýejaılarynyń jáne «Ulttyq aqparattyq tehnologııalar» AQ-nyń júıelerdi ıntegrasııalaý boıynsha birlesken kúsh-jigeriniń nátıjesinde paıda boldy.
Sıfrly qujattar qyzmeti pılottyq rejimde jumys isteıdi jáne ázirge Nur-Sultan, Almaty, Aqtóbe jáne Shymkent qalalary arasynda qoljetimdi. Osy áýejaılar qyzmetin paıdalanýdy josparlap otyrǵan jolaýshylardyń qanatqaqty joba kezinde jeke kýáliginiń túpnusqasyn da ózimen birge alyp júrgeni jón bolady.