Alystaǵy aýylda turatyn aǵaıynnyń sapaly medısınalyq qyzmetke áli kúnge deıin zárý ekeni belgili. Degenmen bul baǵyttaǵy máseleni sheshý boıynsha júrgizilip jatqan jumystardy joq dep te aıta almaımyz. Mysaly, Qaraǵandy oblysynda alty jyljymaly medısınalyq keshen (JMK) jumys isteı bastady. Mine, sonyń nátıjesinde aýyl turǵyndary qalaǵa sabylmaı-aq, medısınalyq tekserýden ótip, salalyq mamandardan keńes alý múmkindigine ıe boldy.
Avtobýs ishindegi mundaı keshenderde birneshe mamandandyrylǵan kabınet bar. Sondaı-aq munda taldaý alý aımaǵy jáne fýnksıonaldyq dıagnostıka kabıneti, rentgen jáne flıýorografııaǵa arnalǵan bólme de qarastyrylǵan.
Bıyl medısınalyq saqtandyrý qory jyljymaly medısınalyq keshen qyzmetterine 503,5 mln teńge bólipti. Bul qarajat Tegin medısınalyq kómektiń kepildi kólemi (TMKKK) jáne Mindetti áleýmettik medısınalyq saqtandyrý (MÁMS) aıasynda konsýltasııalar men zertteýler aqysyn tóleýge baǵyttalǵan. Medısınalyq saqtandyrý qorynyń Qaraǵandy bólimshesiniń dırektory Fazyl Kopobaev jyljymaly medısınalyq keshenniń qyzmetteri TMKKK jáne MÁMS paketi aıasynda da kórsetiletinin aıtady.
– Basqasha aıtqanda, shalǵaı eldi mekenderdiń turǵyndary medısınalyq saqtandyrý júıesindegi mártebesine qaramastan, JMK-de konsýltasııalar men tekserýler alý múmkindigine ıe boldy, – deıdi ol.
Jyljymaly medısınalyq keshender Jezqazǵan kópsalaly aýrýhanasynyń, Abaı, Osakarov jáne Qarqaraly aýdandarynyń ortalyq aýdandyq aýrýhanalarynyń, Temirtaý jáne Qaraǵandy qalasynyń №4 jáne №5 emhanalarynyń balansynda tur.
Aıta ketetin bir jaıt, árbir medısınalyq uıymnyń óz qyzmet kórsetý aýmaǵy bar. Mysaly, №5 emhananyń dárigerleri JMK-men Buqar jyraý aýdanynyń eldi mekenderine baryp, qyzmet kórsetedi. Jaz aılarynda olar akýsher-gınekolog, oftalmolog, pedıatr, stomatolog, terapevt, hırýrgtyń keńesterin berdi. Sonyń nátıjesinde 13,5 myń adam qant dıabetin, arterııalyq gıpertenzııany, glaýkomany jáne basqa da aýrýlardy erte anyqtaýǵa arnalǵan tekserýlerden ótken.
Qaraǵandy oblysy