Keshe Prezıdent janyndaǵy Ortalyq kommýnıkasııalar qyzmetinde ótken kezekti brıfıngke elimizdiń Qorshaǵan ortany qorǵaý jáne sý resýrstary mınıstri Nurlan Qapparov qatysyp, vedomstvo aldynda turǵan maqsat-mindetterge toqtaldy.
Brıfıngte sóz alǵan N.Qapparov Elbasynyń Qazaqstan halqyna arnaǵan Joldaýynda 30 damyǵan memleket sanatyna qosylý maqsattaryna jetýdiń joldary aıqyndalǵanyna toqtala kele, osy aýqymdy qujatta belgilengen mindetterdi oryndaý baǵytynda jalpyulttyq jospardyń qabyldanǵanyn atap ótti. «Bul jospar aıasynda bizdiń mınıstrlikke birqatar tapsyrmalar berilgen-tuǵyn. Birinshiden, kólikti janarmaıdyń ekologııalyq taza túrlerine kóshirý, elimizde elektromobılder óndirisin ashýǵa múmkindikter týdyrý jáne soǵan qajetti ınfraqurylym qalyptastyrý boıynsha usynystar engizý tapsyryldy. Árıne, bul máselelerdi qarastyrý tapsyrmasy bizben birge birqatar ortalyq jáne jergilikti atqarýshy organdarǵa da júkteldi. Osyǵan oraı, arnaıy qurylatyn vedomstvolyq jumys toby bul baǵyttaǵy problemalardy sheshý joldaryn qarastyrady», dedi mınıstr.
Onyń aıtýynsha, qazirgi tańda eldegi avtokólikterdiń 80 paıyzy 10 jyldan astam merzimde qoldanysta bolǵan. Máselen, búginde iri qalalardaǵy jekemenshik kólikterdiń úles salmaǵy 70 paıyzdy quraıdy eken. Bul oraıda, vedomstvo basshysy avtokólik parkterin jańartý jáne kóliktiń ekologııalyq taza túrlerin damytý sharalaryn belgilep, eski kólikterdi kádege jaratý jáne paıdalanýǵa yntalandyrý baǵdarlamasy ázirlenip jatqanyn jetkizdi.
Sondaı-aq, N.Qapparov elimizdegi janarmaı sapasynyń eýropalyq deńgeıden tómen ekendigin de jasyrmady. Munyń sebebin ol jergilikti munaı zaýyttarynyń óndiristik jabdyqtarynyń eskirgendigimen jáne bólshek-saýda oryndarynda standarttardyń oryndalmaı kele jatqandyǵymen baılanystyrdy. «Biz óndiriletin janarmaı sapasyn joǵarylatý, jańa standarttardy ázirleý sharalaryn qarastyrmaqpyz. Qazirgi joldar ınfraqurylym men elektromobılderdi qoldanýǵa múmkindik bermeıdi. Gaz tasymaldaý ınfraqurylymy da damymaǵan. Sonyń saldarynan, kólik salasynda kógildir otyndy qoldaný múmkindigi tómen. Sondyqtan, gaz, elektr qýaty jáne basqa da balamaly qýat kózderimen júretin avtokólikter úshin ınfraqurylymdy quryp, damytamyz. Sondaı-aq, kólikterdi taza qýat kózderine aýystyrý boıynsha memlekettik qoldaý kórsetý sharalary qarastyrylady», dedi bul másele týrasynda mınıstr.
Osylaı deı kele, N. Qapparov bul jumystar aıasynda birqatar zańǵa ózgerister engizý, kólik aǵymdary men ınfraqurylymyn basqarý júıesin jetildirý arqyly osy sektordaǵy energııa tıimdilik pen resýrstardyń únemdiligin arttyrý, kólik salasyndaǵy parnıktik gazdardyń shyǵarylymyn esepteý sapasyn joǵarylatý sharalaryn qarastyrý máseleleri josparda turǵanyn atap ótti. Eger, atalǵan keshendi sharalar jospary qabyldanatyn bolsa, keıin ol elimizdiń bir iri qalasynda qanatqaqty joba túrinde júzege asyrylmaq kórinedi.
Bul kúni N.Qapparovtyń nazarynan Elbasy Joldaýyn iske asyrý jónindegi jalpyulttyq josparda vedomstvoǵa tapsyrylǵan taǵy bir mańyzdy mindet – Nazarbaev Ýnıversıteti aıasynda bolashaq energııany zertteý jáne engizý ınstıtýtyn qurý máselesi de syrt qalmady. «Bul ortalyq energetıkanyń uzaqmerzimdi damý perspektıvalaryn túsinip, bul joldaǵy táýekelderdi eskerip, elimizdiń energetıkalyq ornyqtylyǵy men qaýipsizdigin qamtamasyz etýge septigin tıgizedi. Ortalyqty Nazarbaev Ýnıversıtetiniń janynda birneshe jyl qyzmet atqaryp kele jatqan Energetıkalyq zertteýler ortalyǵy negizinde qurýǵa bolar edi. Sebebi, bul ortalyqtyń materıaldyq-tehnıkalyq bazasy, zerthanalary, kadrlary, sondaı-aq, esimderi álemge tanymal sheteldik ǵalymdardy tartýdyń júzege asqan tetikteri bar. Qurylatyn ınstıtýt adamzatqa belgisiz múldem jańa qýat kózderin ashýmen nemese jańartylatyn energııa kózderin ary qaraı damytýmen qoldanystaǵy tehnologııalardy jetildirý joldaryn izdep, sondaı-aq, energııany óndirý, saqtaý jáne tasymaldaý máselelerin sheshýmen aınalysa alar edi», dedi mınıstr.
Brıfıng sońynda N. Qapparov Qorshaǵan ortany qorǵaý jáne sý resýrstary mınıstrliginiń mamandary Elbasy Joldaýynda belgilengen osyndaı naqty jáne mańyzdy tapsyrmalardy oryndaý úshin bar ynta-jigerlerin jumsap, jumys isteýge daıyn ekendikterin jetkizdi.
Láıla EDILQYZY,
«Egemen Qazaqstan».