Adam saýdasynyń qurbandary áleýmettik qoldaýdy qajet etedi

Atalǵan baıandama Memleket bas­shysynyń, halyqaralyq jáne ulttyq sarapshylardyń oń baǵasyn alyp, Qazaqstandaǵy Halyqaralyq kóshi-qon uıymy mıssııasynyń járdemimen qazaq, orys jáne aǵyl­shyn tilderinde basylyp shyqty.

Tanystyrylymǵa Prezıdent janyndaǵy Adam quqyqtary jó­nindegi komıssııanyń tóraǵasy Igor Rogov, Almaty qalasy áki­­mi­niń orynbasary Maqsat Qı­qymov, Ortalyq Azııadaǵy Haly­qara­lyq kóshi-qon uıymy úıles­tirýshisi­niń mindetin atqa­rýshy Evgenıı Hon, Almaty qalasy Polısııa de­­partamenti bastyǵynyń orynbasary Rýstam Ábdirahmanov qa­tysty.

Igor Rogov óz sózinde baıan­da­manyń mańyzdylyǵyn atap ótip, memlekettik organdardyń adam saý­dasyna qarsy kúres salasyndaǵy jáne daǵdarys ortalyqtaryn, sondaı-aq barlyq sanattaǵy trafık qurbandaryna, ásirese, Qazaqstanda ýaqytsha júrip-turatyn, elimizdiń aýmaǵynda adam saýdasynyń qur­bany bolǵan sheteldik azamattar men azamattyǵy joq adamdarǵa arnaýly áleýmettik qyzmetter kór­setý salasyndaǵy ózara is-qımyl tetik­terin nyǵaıtýǵa erekshe nazar aýdardy.

Adam quqyqtary jónindegi komıssııa tóraǵasynyń aıtýynsha, qazirgi kezde baıandamany Prezıdent quptap otyr. Endigi kezekte tapsyrma berilgennen keıin tıisti organdar bul usynystardy oryndaıtyn bolady. Osy oraıda Qylmystyq Kodekske tıisti tolyqtyrýlar en­gizý, ókiletti organdar jumysyn úılestirýdi kúsheıtý, adam saýdasy qurbandaryn anyqtaý men kúres júrgizýdiń ulttyq mehanızmderin jetildirý, adam saýdasyna qarsy turatyn jeke zań qabyldaý, sonymen birge qoldanystaǵy zańnamaǵa áleýmettik qyzmet kórsetý boıynsha ózgerister men tolyqtyrýlar engizý, TMD elderi jáne EAEO-ǵa múshe-memlekettermen áriptestikti nyǵaıta túsý sııaqty mańyzdy máseleler jumys tobynyń basty nazaryna alynǵan.

Adam saýdasy qurbandary­nyń quqyǵyn memlekettik tur­ǵyda qorǵaýdyń óte mańyzdy eken­digin atap ótken jumys toby­nyń jetekshisi, komıssııa hatshy­sy Tastemir Ábishev atalǵan baıan­damanyń Qazaqstandaǵy adam saýdasyna qarsy kúres, adam saýdasyna baılanysty qylmystyq quqyq buzýshylyqtardyń aldyn alý jáne anyqtaý tıimdiligin arttyrý, sonymen birge elimiz aýmaǵynda adam saýdasy men májbúrli eńbektiń qurbandary bolǵan sheteldik azamattar men azamattyǵy joq adamdardy qosa alǵanda, barlyq adam­ǵa arnaýly áleýmettik qyzmetter kór­setý jónindegi tapsyrmalaryn oryndaý aıasynda daıyndalǵanyn atap ótti. Onyń aıtýynsha, elimizde ataýly áleýmettik kómek 2016 jyl­dan bastap adam saýdasynyń qur­bandaryna kórsetilip keledi. Alaı­da túrli sebeptermen Qazaqstanǵa ýaqyt­sha kelgen eńbek mıgranttary adam saýdasynyń qurbany bol­ǵanda ataýly áleýmet kómek almaıdy. Osy oraıda AQSh, Norvegııa, Shveısarııa men Gollandııa elde­riniń tájirıbelerin negizge alǵan Tastemir Ábishev adam saýdasyna qatysty zań qabyldaǵan Grýzııa, Lıtva, Estonııa, sonymen birge Túrkimenstan men Armenııa elde­riniń kórsetkishterine toqtalyp ót­ti. Ázirge Qazaqstanda mundaı zań joq. Qazaqstan 2008 jyly Palermo hattamasyn ratıfıkasııalaǵan. Hattamaǵa qatysýshy memleketter elinde turǵylyqty jáne ýaqytsha turyp jatqan sheteldik azamattarǵa múmkindiginshe arnaýly áleýmettik kómek kórsetilýi qajet. Statıstıka boıynsha 3 jylda 1100 qylmys tirkelgen. Osy qylmys túrimen aınalysqany úshin 242 adam sotty bolǵan. Degenmen Qazaqstanda bul qylmys túri jyldan-jylǵa aza­ıyp keledi.

Baıandamany talqylaýǵa komıs­sııa músheleri men sarapshylar Vı­talıı Voronov, Zúlfııa Baısaqova, Saltanat Syzdyqova, Názıra Asyl­bekova, Álııa Belonosova jáne Jumajan Joldasbekov qatysyp, qoıylǵan suraqtarǵa jaýap berdi.

Tanystyrylym barysynda Qazaqstan ratıfıkasııalaǵan ha­lyq­aralyq sharttardyń norma­laryna sáıkes qaýqarsyz eńbekshi mıg­ranttar men barlyq sanatta­ǵy adam saýdasy qurbandarynyń quqyq­taryn qorǵaý salasyndaǵy ulttyq zańnama men quqyq qolda­ný tájirıbesine taldaý, ýákiletti memlekettik organdardyń qyzme­tin baǵalaý júrgizilip, Konstıtý­sııa normalary men halyqaralyq ­stan­darttarǵa sáıkes adam saýda­sy qur­bandarynyń azamattyq, áleý­mettik-ekonomıkalyq, eńbek já­ne mádenı quqyqtaryn qorǵaý tetik­terin odan ári jetildirý jónindegi naqty qa­damdar atap ótildi.

Baıandamany tanystyrýǵa mem­­lekettik jáne quqyq qor­ǵaý or­gan­darynyń ókilderi, ǵalym­dar, ÚEU jáne daǵdarys ortalyq­ta­rynyń, bilim berý, densaýlyq saq­taý jáne mádenıet, bıznes sala­sy­nyń mamandary qatysty.

ALMATY