Oqyrmanǵa olja

Dástúrli kitap merekesi bul joly da rýhanı qaýyshý alańyna aınaldy. Dúkender men baspalar ótkizgen jármeńke jurtshylyq úshin kópten ańsaǵan kitabyn qoljetimdi baǵamen alýǵa múmkindik týdyrdy. Arnaıy qurylǵan «Jazýshylar shatyrynda» jańa jınaqtardyń tusaýy kesilip, jazýshy men oqyrman ózara pikir almasty. Týyndylar taldanyp, týyndygerler shyǵarmashylyq josparymen bólisti.

«Keremet bir kitapty oqı otyryp, biz árqashan «Bul týyndynyń avtory kim? Onyń kelbeti qandaı? Ol ne týra­ly aıtady?» degen oıǵa qalamyz. Osy jerde avtor týraly ǵalamtordaǵy shaǵyn anyqtama qyzyǵýshylyǵymyzdy qana­ǵattandyrmaǵandyqtan, súıikti jazýshymyzben shynaıy júzdesý arman­darymyzdyń birine aınalatyny ras. Búgin osy oıymyz júzege asyp súıikti qalamgerlermen kezdesip, áńgi­melestik. Shyǵarmalaryna qatysty suraq­ta­ry­myzdy qoıdyq. Bul festıvaldi jyl saıyn asyǵa kútemiz», deıdi S.Asfendııarov atyndaǵy Medısına ýnıver­sıtetiniń stýdenti Arýjan Asylbekqyzy.

Forým qonaqtary Ksenııa Rogoj­nıkova men Elena Klepıkovanyń shy­ǵarmashylyǵy týraly erekshe qyzyǵý­shylyqpen tyńdady. «Karantındik adamdar» dep atalatyn kitap jeńil tilmen áserli jazylǵan. Ol balalarǵa karantın kezeńinde ózin qalaı ustaý kerektigin úıretedi, vırýstar degen ne jáne olardan qalaı qorǵaný qajettigi týraly aqyl-keńes beredi. Osyndaı taptyrmas balalar týyndysy qalaı jaryq kórgeni týraly avtorlar festıval barysynda aıtyp berdi.

Sharaǵa qatysqan belgili ekobelsendi Ajar Jandosova ekologııanyń qor­ǵaý­shysy ǵana emes, baspager, jazýshy ári kitaphana eriktisi retinde Jandosov ken­tinde Qazaqstandaǵy alǵashqy memle­kettik emes kitaphananyń qalaı ashylǵany týraly áńgimelep berdi.

BAURZHAN qory uıymdastyrǵan KITAPFEST forýmyna arnaıy kelgen megapolıs ákimi Baqytjan Saǵyntaev Alma­tyda jas oqyrmandar sany kóbeı­genin, bul úrdis odan saıyn qanat jaıýy úshin barlyq jaǵdaı jasalatynyn jet­kizdi. Aqylyna aqy suramaıtyn asyl qazyna – kitap. Joba avtorlary kitap merekesi jyl saıyn aýqymyn keńeıte beretinin aıtady.

ALMATY