Burynǵy Densaýlyq saqtaý mınıstri Eljan Birtanovtyń advokattary Memleket basshysy Qasym-Jomart Toqaevqa úndeý joldady. Olar Prezıdentten burynǵy mınıstrdi qýdalaýdy toqtatýdy surady, dep habarlaıdy Egemen.kz.
Eks-mınıstrdiń úlken aǵasy, qoǵamdyq advokat Erjan Birtan jýrnalıster aldyna ZOOM arqyly shyǵyp, úndeý joldady. Ol Eljan Birtanov pen burynǵy densaýlyq saqtaý vıse-mınıstri Oljas Ábishevke qatysty qylmystyq is ótirik pen boljamdarǵa negizdelgenin málimdedi.
«Biz burynǵy Densaýlyq saqtaý mınıstri Eljan Birtanovqa qatysty qylmystyq qýdalaýdy merziminen buryn toqtatý boıynsha kómek surap, ózińizge shyn júrekten ótinish bildiremiz. Qarjylyq monıtorıng agenttiginiń (QMA) málimetinshe, Ericsson Nikola Tesla kompanııasy kelisimsharttyq mindettemelerin oryndamaǵan. Degenmen ENT jazbasha túrde, kerisinshe dálel keltiredi, kelisimge sáıkes platformanyń tehnıkalyq qoldaýyn 2021 jyldyń 5 qarashasyna deıin júrgizdik dep kórsetedi. ENT pıǵylynyń durys emestigin betke basý halyqaralyq arbıtrajǵa júginý sebebi bola alady», dedi Erjan Birtan.
Birtanovtyń úlken aǵasy QMA 2020 jyldyń 31 naýryzyndaǵy aýdıtorlyq esepke súıene otyryp, urlyq baby boıynsha tergeýdi bastaǵanyn atap ótti.
«Biraq 14 aı ótken soń, urlyqty dáleldemeı-aq, «jobanyń máni men kelisimshart talaptary ádeıi burmalanyp», kúdikke taǵylǵan aıyp qyzmet babyn teris paıdalaný dep qaıta ózertildi», dedi ol.
Erjan Birtan 2018 jyldyń sońynda Ericsson Nikola Tesla Platformany ázirleý jáne jetkizý boıynsha jumystyń bir bóligin aıaqtaǵanyn, al Densaýlyq saqtaý mınıstrligi ony kelisimshartqa jáne Qazaqstan Respýblıkasynyń zańnamasyna sáıkes qabyldap alǵanyn aıtty. Kelisimshartta qazaqstandyq vedomstvolar Platformany basqa aqparattyq júıelermen ıntegrasııalaýy kerek ekendigi kórsetilgen. Keıbir júıeler 2019-2020 jyldary ıntegrasııaǵa daıyndalyp, synaqtan ótti. Biraq 2020 jyldyń mamyrynda QMA ony engizý jumystaryn orta joldan toqtatty.
Platforma Prezıdenttiń 2020 jyldyń qazanyndaǵy talabynan keıin buǵattan shyǵaryldy. Al qazir Densaýlyq saqtaý mınıstrligi men QR SDIAО́M ony engizýdi jalǵastyrýda.
«Qurmetti Qasym-Jomart Kemeluly, bizdiń aldymyzdaǵy bul sıýrrealızm stılindegi kartına. Úkimet Platformany engizý boıynsha jumysty áli jalǵastyryp jatyr. ENT oǵan tehnıkalyq qoldaý kórsetýde. Biraq QMA men Bas prokýratýra Eljan Birtanovty zańsyz qolǵa alynǵan tergeýdi, ustaýdy jáne tutqyndaýdy aqtap alý úshin atalǵan platforma jumys istemeıdi, al ENT óz mindettemelerin oryndamady degenge qoǵamdy sendirý úshin jantalasyp baǵýda. 2021 jyldyń 5 qarashasynda Platformany qamsyzdandyrý boıynsha berilgen úsh jyldyq kepildik merzimi aıaqtalady», dedi Erjan Birtan.
Onyń aıtýynsha, QMA men Bas prokýratýranyń arqasynda Qazaqstannyń Platformany ázirleýshilerdiń tehnıkalyq qoldaýynan aıyrylý qaýpi bar. Eger quqyq qorǵaý organdary ENT nıeti durys emes degendi alǵa tarta berse, kompanııa zańdy shara qoldana alady. Halyqaralyq sot prosesteri el bıýdjetine úlken shyǵyn ákelýi múmkin.
«Sizden Konstıtýsııanyń kepili retinde osy zańsyzdyqty toqtatyp, elimizge zııan keltirmeýdi suraımyz», dedi eks-mınıstrdiń úlken aǵasy Eljan Birtan.
Sonymen qatar jýrnalıster suraq qoıýǵa shaqyryldy. Advokat Dmıtrıı Kýrıachenko advokattar Memleket basshysyna nege shaǵymdanýǵa sheshim qabyldaǵanyn suraǵanda, ol bylaı dep jaýap berdi:
«Tergeý men Bas prokýratýrany istiń obektıvtiligi qyzyqtyrmaıtynyn túsindik. Sondyqtan biz kómek surap, Prezıdentke júginemiz», dedi.
Eks-mınıstrdiń úlken aǵasy Eljan Birtan ózine, óz otbasyna, týystaryna, tipti áriptesterine tergeý tarapynan qysym kórsetilip jatqanyn aıtty.
Tergeý organy belgili bir adamǵa qyzyǵýshylyq tanytyp, jaýap alýǵa shaqyrady, al ol adam osy istegi fıgýrantqa aınalady jáne oǵan Eljan Amantaıulymen baılanysýǵa tyıym salynady.
Ol advokattarda eks-mınıstrdiń kinásiz ekendigine qatysty jetkilikti dálelder bar ekenin atap ótti. Bul rette Erjan Birtan zań boıynsha kúdiktiniń kinásin quqyq qorǵaý organdary dáleldeýi tıis ekenin eske saldy.
«Biz ózimizdi basqa álemde júrgendeı sezinemiz. Barlyǵy kinásizdik prezýmpsııasy prınsıpin umytyp ketkendeı, biz túıe emes ekenimizdi dáleldeýimiz kerek. Aıyptaýshy tarap kináni dáleldeýi kerek», dedi Erjan Birtan.
Burynǵy Densaýlyq saqtaý mınıstri Eljan Birtanov Densaýlyq saqtaý mınıstrliginde jumys istemeıtin aqparattandyrý platformasyn qabyldap, qoldanysqa engizip, qyzmet babyn asyra paıdalandy degen kúdikke ilingen.
Birtanov bir jylǵa jýyq úı qamaqta otyr.