Búgin Ázerbaıjannyń Gıandje qalasynda poıyz vagony men avtokóliktiń qatysýymen jol-kólik oqıǵasy oryn aldy, dep habarlaıdy Egemen.kz.
Apa.az agenttiginiń habarlaýynsha, Gıandje qalasynda kenetten ornynan qozǵalǵan vagon kólikke soǵylǵan. Jol apaty «Pocht» kentinde tirkeldi. Atap aıtqanda, atalǵan meken-jaı boıynsha vagon ornynan qozǵalyp, qorǵalmaǵan ótkelde «VAZ 2107» markaly qozǵalmaly avtokólikke soǵylǵan. Nátıjesinde, jeńil kólik júrgizýshisi jeńil jaraqat aldy. Habarlamada aıtylǵandaı, vagon «Ázerbaıjan memlekettik Temir Joldary» JAQ-qa tıesili.
Aıta ketsek, bul Ázerbaıjanda temirjol kóliginiń qatysýymen ótken birinshi oqıǵa emes. Máselen, naýryz aıynda Ázerbaıjannyń taǵy bir iri Sýmgaıt qalasynda qaıǵyly oqıǵa oryn aldy. Jolaýshylar avtobýsy aýmaq boıynsha ótip bara jatqan taýar poıyzymen soqtyǵysty. Jol-kólik oqıǵasy saldarynan poıyz jolserigi Mýbarız Abdýllaev qaza tapty.
Mamyr aıynda osy qalada rettelmeıtin temirjol ótkelinde mıkroavtobýsy bar 10 vagon-sısternadan turatyn manevrlik teplovozdyń taǵy bir soqtyǵysýy oryn aldy. Apat saldarynan poıyz qurastyrýshysy Mýrtýz Abdýllaev qaıtys boldy.
Jalpy, Ázerbaıjan IIM Memlekettik Jol polısııasy bas basqarmasynyń málimetinshe, 2021 jyldyń birinshi jartyjyldyǵynda Ázerbaıjanda 756 jol-kólik oqıǵasy tirkelgen, nátıjesinde 290 adam qaza taýyp, 698 adam jaraqat alǵan.