Birinshi qazanda Pavlodar munaı-hımııa zaýytynda josparly jóndeý jumystary bastalady. Sol kezeńde zaýyt jumysyn toqtatady, dep habarlaıdy Egemen.kz kásiporynnyń baspasóz qyzmetine silteme jasap.
Jóndeý jumystary barlyq tehnologııalyq qurylǵylarda júrgiziletin bolady. Jóndeý qazannyń sońyna deıin aıaqtalyp, zaýyt tolyqqandy jumys isteýge kóshedi dep josparlanǵan.
«Zaýyt jumysy toqtaǵan ýaqytta ózge qazaqstandyq munaı óńdeý kásiporyndary (Atyraý jáne Shymkenttegi zaýyt) kúsheıtilgen rejımde jumys isteıtin bolady», delingen habarlamada.
Esterińizge sala keteıik, eldegi munaı óńdeý zaýyttarynda josparly jóndeý jumystary jylda kestege saı júrgiziledi. Kúrdeli jóndeý úsh jylda bir ret júzege asyrylady. 2018 jyldan beri munaı óńdeý zaýyttarynda kúrdeli jóndeý jumystary júrgizilgen joq.
Bıyl jóndeý jumystarynyń ýaqyty eki ret shegerildi. Birinshi ret josparly jóndeý jumysy shildeden qyrkúıekke, keıin qyrkúıekten qazanǵa aýystyryldy.
«Jóndeý jumystaryn shegerýdiń negizgi sebebi ishki naryqtaǵy janar-jaǵar maı turaqtylyǵyn qamtamasyz etý jáne egin orý naýqany kezindegi suranysty óteý», deıdi kásiporyndaǵylar.
Pavlodar munaı-hımııa zaýyty munaı ónimderiniń birneshe túrin óndiredi. Olardyń qatarynda túrli markaly avtokólik benzıni, dızeldik otyn, reaktıvti otyn, tehnıkalyq kúkirt, bıtýmnyń birneshe túri, munaı koksi, tehnıkalyq kómirtek óndirýge arnalǵan shıkizat bar.