Májilis Tóraǵasy Nurlan Nyǵmatýlın Qazaqstanda alǵashqy resmı saparmen júrgen Ázerbaıjan Mıllı Mejlısiniń spıkeri Sahıba Gafarovamen kelissózder júrgizdi, dep jazady Egemen.kz.
Májilistegi kezdesýde Nurlan Nyǵmatýlın men Sahıba Gafarova parlamentaralyq yntymaqtastyqtyń perspektıvalaryn talqylady. Sonymen birge Qazaqstan men Ázerbaıjan basshylary arasyndaǵy kelisimderdi zańnamalyq qoldaý, sondaı-aq jan-jaqty damý múmkindikterin atap ótti.
Májilis Tóraǵasy Qazaqstannyń Tuńǵysh Prezıdenti - Elbasy Nursultan Nazarbaevtyń Ázerbaıjanmen qarym-qatynasty nyǵaıtýǵa qosqan erekshe úlesin eske saldy. Sonymen qatar búginde Memleket basshysy Qasym-Jomart Toqaev Bakýmen yntymaqtastyqty tereńdetýge úlken mán beretinin atap ótti.
«Bizdiń elimizdi ortaq mádenıet, dástúr, ortaq ótken tarıh baılanystyrady», dedi Sahıba Gafarova.
Sondaı-aq bıyl eki eldiń Táýelsizdik alǵanyna 30 jyl tolǵany týraly aıta otyryp, eki halyqtyń bas qosýy men elderdiń jańǵyrýyndaǵy Elbasy Nursultan Nazarbaev pen Ázerbaıjan Prezıdenti Geıdar Álıevtiń tarıhı róline toqtaldy.
Nurlan Nyǵmatýlın men Sahıba Gafarova yntymaqtastyq toptarynyń, mamandandyrylǵan komıtetterdiń birlesken jumysyn jandandyrýdy, zań shyǵarý tájirıbesimen almasýdy jalǵastyrýǵa kelisti.
Taraptar Túrkistan qalasynda ótken TúrkPA H plenarlyq otyrysy týraly da pikir almasty jáne kezdesýde qabyldanǵan sheshimder parlamentaralyq dıalogty nyǵaıtýǵa úles qosatynyna senim bildirdi.