Qazaqstan Ulttyq Banki nomınaly 100 teńgelik JAMBYL. 175 JYL kolleksııalyq monetalaryn aınalymǵa shyǵarady, dep jazady Egemen.kz.
2021 jyly aqyn Jambyl Jabaevtyń týǵanyna 175 jyl toldy. Onyń shyǵarmashylyǵy halyq poezııasy tarıhynda erekshe oryn alady.
JAMBYL. 175 JYL monetalarynyń sıpattamasy:
Monetanyń aversinde, ortalyq bóliginde Qazaqstan Respýblıkasynyń eltańbasy beınelengen. Eltańbanyń sol jáne oń jaǵynda ulttyq oıý-órnek elementteri ornalasqan. Jıeginde aınaldyra – QAZAQSTAN ULTTYQ BANKI • NATIONAL BANK OF KAZAKHSTAN dep jazylǵan. Tómengi jaǵynda monetanyń nomınalyn bildiretin «100 TEŃGE» jazýy bar.
Monetanyń reversinde Jambyl Jabaevtyń portrettik beınesi, ortalyǵynda – «Artyqsha týǵan azamat» óleńiniń birneshe joly ornalastyrylǵan. Oń jaǵynda oıý-órnek úzindilerinen jasalǵan dombyra kontýrynyń aıshyqty beınesi men mereıtoı datasyn bildiretin «175 JYL» jazýy bar. Monetany aınaldyra JAMBYL jáne QAZAQ HALYQ AQYNY jazýlary, al tómengi jaǵynda daıyndalǵan jylyn bildiretin «2021» jazýy bar.
JAMBYL. 175 JYL kolleksııalyq monetalary MN 25 melhıor qospasynan, nomınaly 100 teńgelik, massasy 15 gramm, dıametri 33 mm, daıyndaý sapasy brilliant uncirculated, taralymy 15 000 dana bolyp daıyndaldy.