21 qazannan bastap «Qazaqfılm» túsirgen «Muqaǵalı» kórkem fılmi otandyq kınoteatrlarda jaryqqa shyǵady, dep habarlady kazakhfilmstudios.kz.
Fılmniń rejısseri – tanymal qazaqstandyq rejısser Bolat Qalymbetov. Kartınany Mádenıet jáne sport mınıstrliginiń tapsyrysymen Sháken Aımanov atyndaǵy «Qazaqfılm» AQ túsirdi.
Túsirilim jumystary О́skemen qalasynda bastalyp, Sankt-Peterbýrg, Almaty jáne Almaty oblystarynda jalǵasty. Rejısserdiń aıtýynsha, kartına aqyn ómiriniń sońǵy jyldary týraly baıandaıdy.
«Biz fılmde Muqaǵalı Maqataevtyń eseıgen kezimen, Qazaq KSR jazýshylar odaǵynyń aqynnyń taǵdyryn otyrysta sheshken ýaqytymen tanysamyz», dedi fılmniń rejısseri Bolat Qalymbetov.
Týyndy ssenarııiniń avtorlary – Júsipbek Qorǵasbek, Bolat Qalymbetov, Ǵazız Nasyrov. Qoıýshy operatory – Edige Nesipbekov, al qoıýshy sýretshi – Ermek О́tegenov. Kompozıtory – Nıkıta Karev, prodıýseri – Almat Masalım.