QR Prezıdenti Qasym-Jomart Toqaev radıo qyzmetkerlerin kásibı merekemen quttyqtady, dep jazady Egemen.kz.
«Barshańyzdy Qazaq radıosynyń ǵasyrlyq mereıtoıymen quttyqtaımyn! Bul – búkil elimizge ortaq qýanysh.
Qazaq radıosynyń jylnamasy – halqymyzdyń júz jylda júrip ótken jolynyń aınasy. Radıo alǵash qurylǵan kúnnen bastap el múddesine qyzmet etip keledi. Qazir de táýelsizdiktiń qadir-qasıeti men ulttyq qundylyqtardy jastardyń sanasyna sińirýge súbeli úles qosýda.
Birneshe býyn urpaq úshin radıo aqparattyń ǵana emes, rýhanııattyń da qaınar kózi boldy. Halqymyzdyń birtýar perzentteriniń daýysy men án-kúıleri qara shańyraqtyń qazynaly qorynda saqtaýly tur. Bul – bizdiń baǵa jetpes asyl muramyz.
Táýelsizdigimizdiń 30 jyldyǵyna tuspa-tus kelgen búgingi mereıtoıdyń orny bólek. Bıyldan bastap 1 qazan «Radıo kúni» bolyp bekitildi. Munyń ózi bul salanyń aqparat aıdynyndaǵy róli erekshe ekenin ańǵartady.
Qazaq radıosy keleshekte de maǵynaly ári mazmundy habarlarymen ulttyń jadyn jańǵyrtyp, memlekettigimizdi nyǵaıtýǵa atsalysa beredi dep senemin!
Barshańyzǵa zor densaýlyq, baq-bereke, shyǵarmashylyq shabyt tileımin!», dep jazylǵan quttyqtaýda.