Qasym-Jomart Toqaev «KAZ Minerals Aktogay» JShS-ne qarasty Aqtoǵaı ken baıytý keshenine baryp, ondaǵy ekinshi ken baıytý fabrıkasyn paıdalanýǵa berý rásimine qatysty. Bul kenishtiń mys óndirý jóninen álemdegi iri ken oryndarynyń qataryna qosylýyna múmkindik berdi, dep jazady Egemen.kz Aqordaǵa silteme jasap.
Prezıdent keshendi aralap kórý barysynda «KAZ Minerals Aktogay» kompanııasy jumysynyń negizgi kórsetkishterimen tanysyp, ken óndirý prosesin kórdi. Sodan keıin Memleket basshysy jańa sýlfıd fabrıkasynyń jumysyn bastaýǵa resmı túrde ruqsat berdi jáne kásiporyn qyzmetkerleriniń aldynda sóz sóıledi.
Qasym-Jomart Toqaev jıynǵa qatysýshylardy ken baıytý fabrıkasynyń iske qosylýymen quttyqtap, ulttyq ındýstrııany damytýǵa tyń serpin beretin jobanyń strategııalyq mańyzy bar ekenin aıtty.
«Men Joldaýymda byltyr ındýstrııalandyrýdyń 10 jyldyǵynda óńdeý ónerkásibiniń ekonomıkany damytýǵa qosqan úlesi alǵash ret taý-ken ónerkásibiniń úlesinen asyp túsip, 13 paıyzǵa jetkenin aıtqan edim. Bıylǵy 8 aıdyń qorytyndysy boıynsha óńdeý ónerkásibiniń ósý qarqyny saqtalyp, shamamen 6 paıyzǵa jetip otyr. Indýstrııalandyrý kartasy aıasynda 12 myń jańa jumys orny ashylyp, 120-dan astam jańa óndiris iske qosyldy. Jyl sońyna deıin «О́nerkásip saıasaty týraly» Zań qabyldanady. Jalpy bizdiń mindetimiz – 2025 jylǵa qaraı óńdeý ónerkásibiniń eksportyn 1,5 ese, al eńbek ónimdiligin 30 paıyzǵa arttyrý. Ol úshin bizge Indýstrııa 4.0 elementteri bar ári ónimderin eksporttaıtyn zamanaýı kásiporyndar qajet. Jańa ken baıytý fabrıkasy osyndaı talaptarǵa saı keledi», dedi Prezıdent.
Sonymen qatar Prezıdent óz sózinde kásiporyn qyzmetkerleriniń el ekonomıkasyn damytýǵa zor úles qosyp otyrǵanyn atap ótti. Memleket basshysy jańa fabrıkany iske qosýdyń áleýmettik-ekonomıkalyq turǵydan tıimdi tustaryn aıtty.
«О́ńdelgen ónimniń eksporty artady. 700 jańa jumys orny ashylyp, salyqtan bıýdjetke qosymsha 80 mıllıon dollar kiris kiredi. Kombınat Shyǵys Qazaqstan oblysyndaǵy jańa áleýmettik nysandardyń qurylysyna, bilim berý jáne emdeý mekemeleriniń jabdyqtalýyn jaqsartýǵa belsendi atsalysady. Bul – bıznestiń áleýmettik jaýapkershiliginiń laıyqty úlgisi», dedi Qasym-Jomart Toqaev.
Memleket basshysy kásiporynnyń biregeıligin atap ótip, keshen basshylyǵynyń áleýmettik jaýapkershiligin joǵary baǵalady.
«Qazaqstannyń Tuńǵysh Prezıdenti – Elbasy Nursultan Ábishuly Nazarbaevtyń kúsh-jigeriniń arqasynda elimizde ındýstrııa salasynda osyndaı iri nysandar boı kóterýde. Mundaı nysandar ónerkásiptiń mánin túsinetin álemdik jáne ındýstrııalyq qoǵamdastyqtardyń jiti nazarynda. Bul – bıznestiń áleýmettik jaýapkershilikti sezinýiniń aıqyn dáleli. Kombınat basshylyǵyna áleýmettik jáne turmystyq máselelerge basa mán bergeni úshin alǵys bildiremiz», dedi Prezıdent.
Prezıdent fabrıkany qysqa merzim ishinde salyp bitirgen qurylysshylarǵa rızashylyǵyn bildirdi.
Bul Táýelsizdiktiń 30 jyldyǵyna laıyqty tartý boldy. Men buǵan deıin osyndaı naqty jobalardy júzege asyrýǵa mán berý qajettigin aıtqan edim. Jańa kásiporyn – sonyń aıqyn dáleli, dedi Memleket basshysy.
Sonymen qatar fabrıkany iske qosý rásiminde «KAZ Minerals PLS» dırektorlar keńesiniń tóraǵasy Oleg Novachýk jáne kásiporynnyń jas mamandary sóz sóılep, Qazaqstan Prezıdentine jan-jaqty qoldaý kórsetkeni úshin alǵys aıtty.
«KAZ Minerals» kompanııalar toby Indýstrııalyq-ınnovasııalyq damý memlekettik baǵdarlamasyn júzege asyrý aıasynda 2017 jyly Aqtoǵaı ken baıytý kesheniniń óndiristik qýatyn keńeıtý jobasyn qolǵa aldy. Kombınattyń ekinshi fabrıkasynyń iske qosylýy ken óńdeý kólemin jylyna 25-ten 50 mıllıon tonnaǵa deıin arttyrýǵa múmkindik beredi. Jalpy, Aqtoǵaı I jáne Aqtoǵaı II jobalaryn qosa alǵanda ken ornyn ıgerýge tartylǵan ınvestısııanyń mólsheri 3,2 mıllıard dollarǵa jetti.
2022 jyldan bastap ken ornynda 190 myń tonna mys, onyń ishinde 20 myń tonna katodty mys óndiriledi dep josparlanyp otyr. Keshende jalpy 3 myńnan astam adam jumys isteıdi. Kásiporynda ozyq tehnologııalar, sonyń ishinde jasandy ıntellektige negizdelgen baǵdarlamalar keńinen qoldanylady.