Nur-Sultanda qaıta óńdeýge jaramdy qaldyqtardy jınaýdan «Tazalyq oıyny» atty kvest jarysy ótti. Komandalardyń tazalyq saıysy Esil ózeniniń jaǵalaýynda uıymdastyryldy. Ekologııalyq shara О́KM Operatory, BI Group kompanııasy jáne «Clean city NC» JShS bastamasymen ótti.
«Tazalyq oıyny» – komandalyq oıyn. Qatysýshy komandalar qaldyqtardy suryptaý jáne qorshaǵan ortany qorǵaýǵa óz úlesterin qosady. Qoqys jınaýǵa 90-ǵa jýyq adam atsalysty. Qatysýshylar komandalarǵa bólinip, eko-tapsyrmalardy oryndaýǵa kiristi. Jarys sharty boıynsha árbir jınalǵan qaldyq túri úshin komandalarǵa 0,4-ten 2 balǵa deıin berildi. Jeńiske jetý múmkindigi turmystyq qaldyqtardy bólek jınap, tapsyrmasyn oryndaǵandarǵa kóbirek berildi.
Eko-jarystyń qorytyndysy boıynsha jeńimpazdarǵa Marwin dúkender jelisinen taýar satyp alýǵa nomınaly 10 myń teńge bolatyn sertıfıkattar tabystaldy. Sondaı-aq eń jas eko-belsendiler sertıfıkattarǵa ıe boldy. «Tazalyq oıyny» barysynda qatysýshylar barlyǵy 300 kılodan astam makýlatýra, plastık, shyny jáne basqa da qaldyq túrlerin jınady. Osy jınalǵan qaldyqtar odan ári qaıta óńdeýge jiberiledi.
Aıta keteıik, 30 qyrkúıekte Nur-Sultan, Qaraǵandy, Petropavl, Temirtaý jáne Semeı qalalarynda «Meniń eko-ómir mektebim» baıqaýynyń qorytyndysy shyǵaryldy. О́skeleń urpaqtyń ekologııalyq mádenıetin qalyptastyrý baǵytynda úzdik bilim berý mekemelerine sertıfıkattar men estelik syılyqtary tabystaldy. Sondaı-aq «EkoAsar – ıgi ister marafony» aksııasy bastaý alady. Igi shara 2021-2022 oqý jylyna josparlanyp otyr.
Jazdygúni «EkoAsar» kezinde 7 500 kılo qaıtalama shıkizat jınalyp, qaıta óńdeýge jiberildi. Odan túsken 363 263 teńge qaraýsyz qalǵan janýarlarǵa azyq satyp alýǵa baǵyttaldy.
Jyl boıy oqýshylar 99 253 kılo makýlatýra, plastık, shyny jáne alıýmınıı qaptamasyn óńdeýge tapsyrdy.
Jalpy, qaıtalama shıkizatty tapsyrýdan túsken soma 2 mln 870 myń teńgeni qurady. Bul qarajat mektep aýmaqtaryn abattandyrý men qaıyrymdylyq baǵytyna jumsaldy.