Nur Otan partııasy janyndaǵy Sybaılas jemqorlyqqa qarsy is-qımyl jónindegi respýblıkalyq qoǵamdyq keńes Shyǵys Qazaqstan oblysynda 2025 jylǵa deıingi sybaılas jemqorlyqqa qarsy is-qımyl partııalyq baǵdarlamasynyń iske asyrylý sapasyn qarady. Jumys toby aımaqtaǵy 2019-2021 jyldardaǵy jaǵdaımen tanysty.
Máselen, oblysta osy kezeńde paraqorlyq faktileri boıynsha 170 sybaılas jemqorlyq qylmys, 174 – bıýdjet qarajatyn jymqyrý, 21 – laýazymdyq ókilettikterin teris paıdalaný faktileri tirkelgen. 222 adam qylmystyq jaýapkershilikke tartylǵan. Olardyń 5-ýi respýblıkalyq, 25-i oblystyq, 17-si qalalyq jáne aýdandyq deńgeıdegi basshylar.
Otyrys barysynda partııa músheleri oblystaǵy sybaılas jemqorlyq deńgeıi boıynsha «kósh bastap turǵan» bilim salasyna basa nazar aýdardy. 3 jylǵa tolmaıtyn kezeńde 45 qylmys tirkelgen.
Sondaı-aq nurotandyqtar Semeı ákimdigi janynda sybaılas jemqorlyqqa qarsy is-qımyl máseleleri jónindegi komıssııanyń joqtyǵyna nazar aýdardy. Bul rette, qalada 2019 jyldan beri 58 sybaılas jemqorlyq qylmys tirkelgen. Osyndaı komıssııa Shemonaıha aýdany ákimdiginiń janynan da qurylmaǵan.
«Árbir jergilikti atqarýshy organnyń janynda mundaı komıssııa bolýǵa tıis. Semeıde jáne Shemonaıha aýdanynda quqyq buzýshylyqtardyń aldyn alý boıynsha komıssııalar bar, biraq ol múldem basqa, olar turmystyq zorlyq-zombylyqtan bastap, qaýipsiz kólik júrgizýge deıingi jalpy máselelerdi qaraıdy. Sybaılas jemqorlyq qaterlerin taldaýmen eshkim aınalyspaıdy, shyntýaıtynda aınalysatyn adam da joq», dep málimdedi Keńes tóraǵasy, Májilis depýtaty Erlan Saırov.
Shyǵys Qazaqstan oblysynda sybaılas jemqorlyqqa qarsy is-qımyl jáne onyń aldyn alý boıynsha úlken máseleler bar ekenin Keńes tóraǵasynyń birinshi orynbasary Qaıyrbek Súleımenov te atap ótti. Onyń aıtýynsha, basqa óńirlerdegi jaǵdaımen salystyrǵanda, tap osy Shyǵys Qazaqstan oblysy boıynsha barynsha synǵa toly baıandama jasaldy, alaıda soǵan qaramastan oblystyń jaýapty oryndarynyń birinshi basshylary otyrysqa qatyspaǵan.
«Jalpy, túrli zań buzýshylyqtar tek Shyǵys Qazaqstan oblysy úshin ǵana emes, barlyq oblystarǵa da tán, ıaǵnı formalızm, analıtıkanyń bolmaýy, syrǵytpa jaýap berý jáne t.b. Sybaılas jemqorlyqqa qarsy is-qımyl jasaý boıynsha uıymdastyrýshylyq jumystar joq. Semeıde jáne Shemonaıha aýdanynda sybaılas jemqorlyqqa qarsy is-qımyl komıssııasynyń qurylmaǵany da osynyń qatarynda. Eger komıssııa bolmasa, onda nátıje de joq», dedi Qaıyrbek Súleımenov.
Sondaı-aq Keńes músheleri oblysta partııanyń saılaýaldy baǵdarlamasyn iske asyrý aıasynda 18 tarmaq boıynsha jumystardyń oryndalmaý qaýpi bar ekenin atap ótti. Jyl basynan beri oblys boıynsha Nur Otan fraksııasynyń 80%-y qalalyq jáne aýdandyq máslıhattarda saılaýaldy ýádelerdiń oryndalý máselelerin tek bir-aq ret qaraǵan. Katonqaraǵaı aýdandyq máslıhatynda partııalyq fraksııa saılaýaldy baǵdarlamalardyń oryndalmaý jaǵdaıyn múldem qarastyrmaǵan.
Keńes múshesi, «Aq jol» partııasynyń ókili Merýert Qazbekova Shyǵys Qazaqstan oblysyna sapary barysynda jergilikti sheneýnikter jumys tobyn elemedi dep esepteıtinin jetkizdi.
Otyrys qorytyndysy boıynsha Shyǵys Qazaqstan oblysy ákiminiń birinshi orynbasary Almashan Smatlaevty sógis túrinde, Semeı qalasynyń ákimi Baqytjan Baıahmetovti eskertý túrinde, Shemonaıha aýdanynyń ákimi Grıgorıı Akýlov pen oblystyq bilim basqarmasynyń basshysy Saırangúl Jumadilovany sógis túrinde partııalyq jaýapkershilikke tartý týraly sheshim qabyldandy.
Sonymen qatar Shyǵys Qazaqstan oblysynyń jergilikti atqarýshy organdaryna sybaılas jemqorlyqqa qarsy jumysty kúsheıtý, Nur Otan partııasynyń saılaýaldy baǵdarlamasyn iske asyrý jónindegi qyzmetti jandandyrý jáne oblystyń barlyq qalalary men aýdandarynda sybaılas jemqorlyqqa qarsy is-qımyl komıssııalarynyń tıisti jumysyn qamtamasyz etý usynyldy.