Nur-Sultanda vaksınasııalanǵandar arasynda eki bólmeli páterdiń utys oıyny 7 qazan kúni saǵat 14:10-da Habar telearnasynyń tikeleı efırinde ótedi, dep jazady Egemen.kz qala ákimdiginiń resmı saıtyna silteme jasap.
Eki bólmeli páter Saryarqa aýdanynda, Esil ózeniniń jaǵasynan 900 metr qashyqtyqta, «Rıo-de-Janeıro» turǵyn úı kesheninde ornalasqan. Demeýshisi — «G-Park» qurylys kompanııasy.
«Eki bólmeli páterdiń avtomatty utys oıynyna osy jyldyń 25 maýsymy men 28 qyrkúıegi aralyǵynda qaladaǵy vaksınasııa pýnktteriniń (medısınalyq mekemelerdegi, saýda oıyn-saýyq ortalyqtaryndaǵy) kez kelgeninde ekpeniń birinshi komponentin alǵan 18 jastan asqan turǵyndar qatysady. Sonymen qatar tikeleı efırde páterden bólek ózge de baǵaly syılyqtar oınatylady: úsh iPhone12, tońazytqyshtar, teledıdarlar, mıkrotolqyndy peshter, shańsorǵysh, útik, fen jáne t.b.», delingen vedomstvo habarlamasynda.
Birge platformasynda (https://birge-elorda.kz/nur-sultan) utys oıynynyń jeńimpazdaryn anyqtaý úshin arnaıy randomaızer servısi ornatylǵan. Ol ekpe alǵandardyń ID nómiri arqyly júlde ıelerin tańdaıdy. Ázirleýge IT-qaýymdastyq ta qatysty. Vaksınalanǵandar boıynsha Servıs QR Densaýlyq saqtaý mınıstrliginiń aqparattyq júıesimen biriktirilgen.