Shymkent qalasynda QR Táýelsizdiginiń 30 jyldyǵyna oraı jas aqyndar arasynda alǵash ret respýblıkalyq «Kúmis dombyra» aıtysy ótti, dep jazady Egemen.kz.
Aıtysqa 14-29 jas aralyǵynda 30 aıtysker aqyn qatysýǵa nıet bildirip, irikteý nátıjesi boıynsha 16 aqyn baq synady. Qatysýshylarǵa belgili aıtysker aqyndar men elimizge tanymal qoǵam belsendileri baǵa berip, qazylyq etti.
Shymkent qalasy ákiminiń birinshi orynbasary Shyńǵys Muqan, Shymkent qalasy máslıhatynyń hatshysy Bahadyr Narymbetov jeńimpazdardy quttyqtap, baǵaly syılyqtarmen marapattady.
Aıtys nátıjesi boıynsha Aqmola oblysynyń ókili Nurmahan Jaqypbek bas júlde – «Kúmis dombyra» ıegeri atandy. 16 aqynnyń ishinen oza shapqan jeńimpaz kúmisten jasalǵan dombyra jáne baǵaly syılyqqa ıe boldy.
Aısholpan Tóleýtaı (Shyǵys Qazaqstan oblysy) 1-orynǵa ıe bolsa, Beksultan Orynbasarov (Qyzylorda oblysy) 2-oryn, Meıirjan Jaqyp (Túrkistan oblysy) pen Nurǵalı Ánapııa (Shymkent qalasy) 3-oryndy jeńip aldy.
Sonymen qatar, «Maılyqoja Sultanqojauly» atyndaǵy arnaıy júlde Bekjan Bazarbekke (Almaty qalasy), «Áselhan Qalybekova» atyndaǵy arnaıy júlde Aıym Asylbekqyzyna (Nur-Sultan qalasy) buıyrdy.
Barlyq jeńimpazdarǵa arnaıy baǵaly syılyq tabys etildi.
«Sharanyń maqsaty – Táýelsizdiktiń 30 jyldyǵynda jetken jetistikterdi nasıhattaý, jas aqyndardyń ishki múmkindigin ashyp, shabytyna qanat bitirý. Aıtyskerler arasynan jańa esimder taýyp, daryndy jastardy qoldaý», dep habarlady Shymkent qalasy ákimdiginiń baspasóz qyzmeti.