Almatyda VII Eýrazııalyq monopolııaǵa qarsy forým ótip jatyr, dep jazady Egemen.kz.
VII forým barysynda:
- Taýar naryqtaryndaǵy básekelestiktiń jaı-kúıin baǵalaýdyń jáne tergeý júrgizýdiń jańa tásilderi
- Transshekaralyq naryqtarda básekelestik buzylǵan jaǵdaıda naryq sýbektileriniń óz quqyqtary men múddelerin qorǵaý múmkindikteri
- Básekelester arasyndaǵy daýlardy sheshý tájirıbesi
- Naryq sýbektileriniń múddelerin qorǵaý praktıkalyq suraqtary
- Monopolııaǵa qarsy komplaens
– monopolııaǵa qarsy táýekelderdi tómendetýdiń tıimdi tásili qaralyp, talqyǵa túsedi.
«Forýmdy Qazaqstanda ótkizý jaqsy dástúrge aınaldy. Munda jyl saıyn jaqyn jáne alys shetelderdiń monopolııaǵa qarsy agenttik basshylary bas qosady. Álemdik ekonomıkalyq qaýymdastyq pen bıznes qurylym ókilderi óz oılaryn ortaǵa salady. Kóterilgen máseleler bizdiń eldiń odan ári damýy úshin qajet. Qazaqstan Prezıdenti Qasym-Jomart Toqaev ádil básekelestikti Qazaqstannyń jańa ekonomıkalyq baǵyty negizdelýi tıis jeti prınsıptiń biri dep ataǵan bolatyn. Qazaqstannyń jańa ekonomıkalyq baǵyty osyǵan negizdelýi tıis. Úsh negizgi oıynshynyń naryqtaǵy ortasha úlesi búginde ár túrli salalarda 70-ten 100%-ǵa deıin. Memleket basshysy muny óziniń byltyrǵy Qazaqstan halqyna Joldaýynda atap ótti», degen QR Básekelestikti qorǵaý jáne damytý agenttiginiń tóraǵasy Serik Jumanǵarın eldegi básekelestikke barynsha qolaıly jaǵdaı jasaý qajet ekenin aıtty.
Forým sheńberinde Halyqaralyq básekelestik quqyq, ınnovasııalar jáne saıasat ortalyǵy men BRIKS halyqaralyq básekelestik quqyq jáne saıasat ortalyǵy arasynda yntymaqtastyq týraly shartqa qol qoıylady.
Aıta keteıik, sharany Qazaqstan Respýblıkasy Básekelestikti qorǵaý jáne damytý agenttigi men «Básekelestik saıasatty damytý jáne qorǵaý ortalyǵy» AQ uıymdastyrdy.