Oqıǵa Kıevten Nur-Sultan qalasyna ushyp kele jatqan ushaqta oryn alǵan. Osy reıspen jolaýshy retinde áıel azamatshasyna jedel kómek kórsetken Ulttyq ulan áýe kemesiniń komandıri, maıor Stanıslav Smýrygın de ushyp kele jatqan bolatyn, dep jazady Egemen.kz.
«Tańǵy saǵat bes shamasy kezi, barlyǵy qalyń uıqyda edi. Bir mezette ushaqtyń ishinde abyr-sabyr bastalyp ketti. Áýe serigi ary-beri júgirip, jolaýshylardan kómek suraı bastady. Osy arada daýys kótergish qurylǵymen «Medısına qyzmetkeri bar ma?» dep habarlama jetkizildi. Ornymnan dereý turdym da áýe seriginiń qasyna bardym. О́zimdi tanystyrdym. Men dáriger emes, áskerı ushqysh ekenimdi jáne alǵashqy kómek kórsete alatynymdy aıttym. Eń aldymen qan qysymyn ólshedim, 80 de 60 nátıjesin kórsetti. Sol kezde bortserikke tezdetip qara kofe alyp kelýdi suradym. Qan qysymy kóterildi. Sodan soń ottegi ballondardy berýdi suradym. Adamǵa aýa qajet ekenin ishteı bildim. Osylaısha Nur-Sultan qalasyna da jettik. Jol boıy onyń hálin surap, qolyn qysyp, sózbenen qoldaý kórsetip turdym. Áýejaıda sanıtarlyq brıgada qyzmetkerleriniń qolyna tapsyrdym», deıdi ulandyq ofıser.
Barlyq qıyndyqtar men shekteýlerge qaramastan Ulttyq ulan ofıseri eptilik tanytyp, bilgirliginiń arqasynda áıel adamǵa dereý kómek kórsetip, tipti, ómirin ajaldan arashalap qalǵany shyndyq.
«Osyndaı jaǵdaılarda kómekke kelý – ár azamattyń boryshy, ásirese, pogon taqqandarǵa bul paryz sanalady. Mundaı jaǵdaıǵa alǵash ret tap boldym. Jaı kezde ózim ushaqty basqaramyn, osy joly jolaýshy bola turyp dáriger keıpin eńserdim. Adam densaýlyǵyna kómek berý úshin bar bilgenimdi saldym», deıdi Stanıslav Smýrygın.
Ofıser mamandyǵy boıynsha áskerı ushqysh. Ulttyq ulan qatarynda 2004 jyldan bastap qyzmet etip keledi. Kıevke qyzmettik issaparmen barǵan eken. Áskerı ushaqty basqarýda tájirıbesi mol. Búginde An-74 áýe kemesiniń komandıri bolyp qyzmet atqarady. Áskerı ushaqpen eki myń saǵattaı áýede bolǵan.