Almatyda Dostyq úıinde Memlekettik hatshy Qyrymbek Kósherbaev Qazaqstannyń halyq ártisi, eki márte Memlekettik syılyqtyń ıegeri Doshan Joljaqsynovqa «Otan» ordenin tabys etti, dep habarlaıdy Egemen.kz.
Mereıli mereıtoı qarsańynda Prezıdent Jarlyǵymen ulttyq mádenıetti, kınematografııany jáne teatr ónerin damytýǵa qosqan aıryqsha eńbegi úshin tanymal akter jáne rejısser Doshan Joljaqsynov «Otan» ordenimen marapattalǵan bolatyn.
О́ner qaıratkeriniń mereıtoı qurmetine oraı Memlekettik hatshy Qyrymbek Kósherbaev Tuńǵysh Prezıdent – Elbasy N.Nazarbaevtyń jáne Prezıdent Q.Toqaevtyń quttyqtaýyn oqyp, elimizdiń mádenıeti men ónerine qosqan zor úlesin, san qyrly shyǵarmashylyǵy joly týraly aıtyp ótti.
О́z kezeginde Mádenıet jáne sport mınıstri Aqtoty Raıymqulova óner maıtalmanyn quttyqtap, kıno, teatr ónerindegi eńbegi týraly aıtyp óttti. Jıyn ary qaraı Almaty qalasy ákiminiń orynbasary Erjan Babaqumarov, «Ulttyq kınony qoldaý memlekettik ortalyǵynyń basqarma tóraǵasy Esetjan Qosýbaev, Qazaqstannyń eńbek sińirgen ártisteri Lıdııa Kádenova, Aıdos Bektemirov, kompozıtor Tólegen Muhamedjanov, taǵy da basqa qoǵam jáne óner qaıratkerleri quttyqtady.
Jastaıynan óner salasynda júrgen Doshan Joljaqsynov teatr men kınoda shoqtyǵy bıik keıipkerlerdi somdaǵanyna halqy tánti. Halyq ánderi men qazirgi qazaq kompozıtorlary ánderin sheber oryndaýshy retinde keńinen tanylǵan D.Joljaqsynov ulttyq kıno óneriniń damýyna óz úlesin qosyp, «Gaýhartas», «Daladaǵy qýǵyn», «Altyn kúz», «Ompa», «Aq barystyń urpaqtary», «Kóshpendiler», «Qunanbaı», «Birjan sal» jáne basqa da fılmderge túsip, teatr jáne kıno salasynda eki júzden astam rólderdi somdady.