«Janýarlarǵa jaýapkershilikpen qaraý týraly» Zań jobasyn qabyldaýdyń maqsaty janýarlarǵa qaraýdy quqyqtyq retteý, olarǵa izgilikti qaraý bolyp tabylady, onyń ólshemi jalpy qabyldanǵan etıkalyq qundylyqtar sheńberinde janýarlar men adamnyń ál-aýqaty bolyp tabylady. Bul týraly Ortalyq kommýnkıasııalar qyzmetinde ótken brıfıngte QR Ekologııa, geologııa jáne tabıǵı resýrstar mınıstrliginiń vıse-mınıstri Álııa Shalabekova málim etti, dep habarlaıdy Egemen.kz.
«Janýarlarǵa qatygezdiktiń jıi kezdesetin faktileri qoǵam men úkimettiń alańdaýshylyǵyn arttyrady. Memleket basshysynyń ótken jylǵy joldaýynda kórinis tapqan osy máselege nazar aýdarý deńgeıi memlekettik retteýdiń mańyzdylyǵy men qajettiligin kórsetedi. Zań jobasy azamattardyń adamgershilik tárbıesiniń ıdeologııasyn qalyptastyrady. Atap aıtqanda, janýarlardy ustaýdyń moraldyq jáne adamgershiliginiń negizgi prınsıpteri, mysaly: janýarlardy aýyrý men qınalýǵa ákep soqtyratyn jaratylys retinde qaraý; janýardyń ómiri, densaýlyǵy jáne ál-aýqaty úshin ıesiniń derbes jaýapkershiligi; janýarlardy qatygezdikten qorǵaý; halyqtyń janýarlarǵa janashyrlyq jáne adamgershilik qatynasqa tárbıeleý. Osy qaǵıdattardy iske asyrý úshin talaptar men erejelerdi belgileý arqyly osy quqyqtyq qatynastardy memlekettik retteý tetikteri bekitiledi», dedi spıker.
Zań jobasyn ázirleýshiler jańa zań Qazaqstannyń progressıvti, zamanaýı memleket retindegi ımıdjin nyǵaıtyp, barlyq tirshilik ıelerine adamgershilik pen izgilikti qatynasty tárbıeleýge, úı janýarlaryna qatysty turmystyq zorlyq-zombylyqtyń aldyn alýǵa múmkindik beredi dep esepteıdi.