Búgingi kúnge deıin 1974 jylǵy úlgidegi KSRO pasportymen ómir súrip kelgen Larısa Chernysheva alǵash ret Qazaqstan Respýblıkasy azamatynyń jeke kýáligin aldy, dep habarlaıdy Egemen.kz IIM-ge silteme jasap.
Qart áıelge kópten kútken qujattaryn alýǵa Aqtóbe oblysynyń polıseıleri kómektesti. Ony Muǵaljar aýdanynyń polısııa bólimine shaqyryp, saltanatty túrde jeke kýáligi men gúl shoqtaryn tabystady.
Odan ózge zeınetkerge arnaıy daıyndalǵan azyq-túlik sebeti usynyldy. Larısa Chernyshevanyń aıtýynsha, buǵan deıin ol HQKO-ǵa jáne anyqtama bólimine júgingen, onda áıeldi quqyqtyq mártebesin anyqtaý úshin aýmaqtyq kóshi-qon qyzmeti bólimshesine jibergen.
– Mende týý týraly kýálik te, el aýmaǵynda turatyndyǵymdy rastaıtyn qujat ta bolǵan joq. Kóshi-qon qyzmetiniń qyzmetkerleri tıisti organdarǵa ózderi suraý jiberip, qajetti aqparat aldy, Qazaqstan Respýblıkasynyń azamattyǵyna jatatyndyǵymdy anyqtaı aldy. Meniń máselemdi qysqa merzimde sheship bergenderińiz úshin raqmet. Men Aqtóbe oblysy polısııa departamentiniń basshylyǵyna jáne IIM mınıstrine rızashylyǵymdy bildiremin, – dep atap ótti zeınetker.
Endi qart áıel barlyq memlekettik qyzmetterdi basqa qazaqstandyqtarmen birdeı paıdalana alady. Jeke basyn kýálandyratyn qujattary joq azamattardyń densaýlyq saqtaý, bilim berý salasyndaǵy qyzmetterdi alýda, qajetti járdemaqylar men zeınetaqylardy resimdeýde múmkindikteri shektelip, resmı túrde jumysqa ornalasa almaıtyndyǵyn atap ótken jón.
Osyǵan baılanysty polısııa qujattary joq azamattarǵa Qazaqstan Respýblıkasy azamatynyń nemese azamattyǵy joq adamnyń jeke kýáligin resimdeý úshin turǵylyqty jeri boıynsha kóshi-qon qyzmetine júginýdi usynady.