Zeınetkerler utyla qoımaıdy

Ulttyq banktiń keshegi, 11 aqpan kúngi teńgeniń aıyrbas baǵamyn burynǵy deńgeıinde ustap qalýdan bas tartý jónindegi kópshilik kútpegen shuǵyl sheshimi oblys turǵyndary arasynda ártúrli pikirler týǵyzdy.  Osyndaı tolqymaly kóńil-kúı aýany qurmetti eńbek demalysynda júrgen aǵa býyn ókilderi arasynda da baıqalmaı qalǵan joq. Osyǵan baılanysty birden kókeıge kelgen keıbir oı-pikirlerimdi ózim turaqty túrde jazdyryp alyp oqıtyn elimizdiń bas basylymy «Egemen Qazaqstanǵa» jedel joldaǵandy jón kórdim. Meniń oıymsha, áp degende adamdardyń kóńil-kúıine teris, jaǵymsyzdaý áser etetin mundaı shetin máselede aptyqpaǵan, sezimdi aqylǵa jeńgizgen jón be dep oılaımyn. Sondaı-aq, bul qadam jeti ret ólshep, bir ret kesip degendeı, ábden oılanyp, saraptalyp jasalǵan qadam degen oıǵa sengim keledi. Ásirese, aıyrbas baǵasynyń AQSh dollaryna shaqqanda 185 teńgege deıin ósýi, eń birinshiden, ekonomıkamyzdyń tıimdiligin kóterý, qarjylyq turaqtylyqty saqtaý turǵysynan qabyldanyp otyrǵanyna kúmán keltirýge bolmaıdy. Sondyqtan da teńgeniń aıyrbas baǵamynyń quny kúrt óskeninen aqyrzaman týǵyzyp, kúıreýik kóńil-kúıge berilýdiń qajeti shamaly degen oıdamyn. Al, Ulttyq banktiń mundaı kúrt sheshiminen keıin zeınetkerlerdiń jaı-kúıi qandaı bolmaq degen basy ashyq saýalǵa kelsek, budan zeınet jasyndaǵy zamandastarymyz aıtarlyqtaı utylys tappaıdy dep aıtýǵa bolady. Árıne, nendeı qubylysqa da tıisti dálel taýyp, aıta almasań, qurǵaq sóz adamdardy sendire almaıdy. Osyǵan baılanysty tómen­degideı derekterdi oqyrmandar nazaryna taǵy bir qaıtara bere ketkenniń artyqshylyǵy joq sekildi. Bıyl elimizde turatyn zeınetkerlerdiń zeınetaqysy toǵyz paıyzǵa óskeni belgili. Onyń ústine ınternetten jáne basqa da senimdi derek kózderinen alynǵan málimetterge qaraǵanda, tutastaı respýblıkadaǵy jáne óńirlerdegi ınflıasııa deńgeıi sonshalyqty joǵary emes. Bul nebári 7 paıyz tóńireginde ǵana. Al Aqjaıyq óńirinde bul kórsetkish budan da tómen. Osyndaı faktorlardy eskere kelgende, teńgeniń dollarǵa shaqqandaǵy jańa baǵamynyń plıýsteri men mınýs­tary arasyndaǵy aıyrmashylyq zeınetkerler úshin shamamen eki paıyzǵa teńesedi eken. Qalaı degende de, Ulttyq banktiń keshegi shuǵyl sheshiminen, aıyrbas baǵasynyń satylap emes, birden kúrt óskeninen utpasaq, utylmasymyz anyq. Jaısań AQBAI, zeınetker. ORAL.