Zamannyń bir ornynda turmaıtyny sııaqty, sol zamannyń yrǵaǵyna baǵynǵan ekonomıka da birqalypty bolmaıdy. Keshe ǵana 1 AQSh dollarynyń teńgege shaqqandaǵy baǵamy aıyrbas pýnktterinde 156, 3 teńgeniń kóleminde bolsa, mine, búgin ol kútpegen jerden 185 teńgege kóterildi.
Elimiz táýelsizdik alǵaly beri mundaı qarjylyq «silkinisterdiń» talaıyn bastan keshtik. Toqsanynshy jyldardyń basynda rýbl, ıaǵnı sol kezdegi somymyz gıperınflıasııaǵa ushyrap, halyq kúndelikti tutynatyn zattaryn alý úshin dúkenge 50 myń nemese 100 myń sommen barǵanyn áli umyta qoıǵan joqpyz. Abyroı bolǵanda, elimizdiń tól teńgesi qarjylyq aınalymǵa shyqqannan keıin «saban aqshadan» qutylyp, eldiń ekonomıkasy da, halyqtyń turmysy da túzele bastady.
Biraq tól teńgemiz qansha jerden tegeýrindi bolǵysy kelgenimen onyń AQSh dollaryna shaqqandaǵy baǵamy el ekonomıkasynyń táýelsizdigi jyldarynda birneshe ret kóterilip úlgerdi. Biraq ol burynǵy Keńes rýblindeı shekten shyǵa qunsyzdana qoıǵan joq. Kórshi О́zbekstandaǵy aǵaıyndardyń somynyń qandaılyq deńgeıde ekenin estip, bilip otyrmyz ǵoı, al olarǵa qaraǵanda bizdiń teńge AQSh-taı alpaýyt el dollarynyń qysymyna áli de des bermeı kele jatqan joq pa?!
Jasyryp, jabatyn nesi bar, qansha degenmen, halyqtyń qobaljyp, abyrjıtynyn túsinemin. Bazarlar men dúkenderdegi azyq-túliktiń baǵasy birden aspandap ketpese de, burynǵydan eptep qymbattaýy múmkin. Janarmaı beketteriniń ıeleri de benzınniń baǵasyn «shegirtkeshe sekirtetini» aqıqat. Árbir sanaly azamat óz eliniń álem ekonomıkasyna qarap kósh túzeıtinin biledi. Qazaq eli de, qazaq halqy da dúnıejúzinde bolyp jatqan ekonomıkalyq aýytqýlar men dúmpýlerden shet qala almaıdy.
Bizdiń mekemege kelsek, azyq-túlik jetkizip berýshilermen kelisimshart jasalyp qoıylǵan. Sondyqtan olar bizge qymbatshylyqty alǵa tartyp, bultaqtaı almaıdy. Al halyq kúndelikti tutynatyn zattardyń baǵalarynyń óspeýin Úkimet pen jergilikti bılik nazarda ustap, qatań baqylaıtyn bolady dep oılaımyn. Ár kezde de solaı bolǵan. Bul joly da solaı bolady. Demek, «sabyr túbi sary altyn» degendeı, talaı qıyndyqty bastan ótkergen qajyrly, erik-jigeri myqty halqymyz bul syn saǵatta da ózine tán sabyrlylyqtyń úlgisin kórsetip, arqalaryna batqan aýyrtpalyqty salmaqtylyqpen kótere biledi dep senemin.
Jorataı MAMYRALIEV,
№1 qarttar men múgedekterge
arnalǵan ınternat úıiniń dırektory.
Jambyl oblysy.