IIM Esirtki qylmysyna qarsy is-qımyl departamenti basqarmasynyń basshysy Berikhan Nurǵalıevtiń habarlaýynsha, birer kúnnen keıin sıntetıkalyq esirtkiniń taǵy 11 jańa túri men 17 prekýrsordyń zańsyz aınalymy úshin qylmystyq jaýapkershilik qarastyrylǵan Úkimet Qaýlysy kúshine enedi.
Onlaın formatta ótken brıfıngte basqarma basshysy eń kóp taralǵan esirtki úshin qylmystyq salmaqtyń aýyrlaı túskenin aıta kelip, bas bostandyǵynan aıyrýdyń naqty merzimi belgilengenin málimdedi. Sondaı-aq budan bylaı «pıraleron» (jyldamdyq), mefedron (mef) jáne sıntetıkalyq kannabınoıdterdiń (spaıs) zańsyz aınalymymen aınalysqandardy qylmystyq jaýapkershilikke tartý úshin bir gramnyń ózi jetkilikti. Al buryn «sıntetıka zerthanashylaryn» jazaǵa tartý úshin «aq ajaldyń» salmaǵy 50 gramnan kem bolmaýǵa tıis edi.
IIM men Parlament depýtattarynyń adam aǵzasyna áseri óte kúshti zattardyń zańsyz aınalymy úshin jaýapkershilikti kózdeıtin zań jobasyn birlesip ázirlep jatqanyn aıtqan polısııa polkovnıgi: «Keı dári-dármekterdi qoldanǵanda adam sanasy ózgere bastaıdy. Esirtki jasaýshylar bul dárilerdi jasóspirimderdiń densaýlyǵyna tájirıbe jasaý maqsatynda psıhoaktıvti zattar retinde paıdalanýy ábden múmkin», dedi.
Esirtki qylmysyna qarsy is-qımyl boıynsha atqarylǵan jumystardyń biri – joıylǵan jasyryn esirtki zerthanalary. Jyl basynan beri polısııa qyzmetkerleri osyndaı 13 zerthanany áshkerelegen. Onyń 2-ýi – Nur-Sultan qalasynda, 4-ýi – Qaraǵandy, 3 – Almaty men Soltústik Qazaqstan oblystarynda jáne bireýi Aqtóbe óńirinde anyqtalyp otyr. Máselen, Qaraǵandy oblysynda júrgizilgen aýqymdy operasııa kezinde elimizdiń birneshe óńirinde jumys istegen iri esirtki sındıkatynyń joly jabyldy. Qazirgi tańda osy derek boıynsha transulttyq qylmystyq qoǵamdastyq qurýǵa jáne ony basqarýǵa, uıymdasqan qylmystyq toppen esirtki satýǵa qatysty 8 qylmystyq is qozǵalǵan.
Brıfıng barysynda elimizdegi esirtki qylmysyna qarsy is-sharalar nátıjelerine keńinen toqtalǵan spıker «Refleks» jáne «Qarasora» jedel operasııalarynyń qorytyndylarymen de tanystyrdy. Sıntetıkalyq esirtkilerdi óndirý jáne ótkizý faktilerin anyqtaýǵa baǵyttalǵan «Refleks» operasııasy jeltoqsanǵa deıin jalǵasady. B.Nurǵalıevtiń málimdeýinshe, jedel is-sharanyń alǵashqy aptasynda-aq sıntetıkalyq esirtkilerdiń zańsyz aınalymyna qatysty 6 qylmys anyqtalyp, shamamen 1 kılogramm esirtki tárkilengen. Al bir kılo «sıntetıka» úsh myń dozaǵa teń.
«Qarasora» – jabaıy soranyń pisip-jetilý kezinde elimizde jyl saıyn ótkiziletin arnaıy operasııa. Bıyl respýblıkalyq operasııa aıasynda 851 esirtki qylmysy, onyń ishinde 416 ótkizý, 126 esirtki saqtaý, quramynda esirtki bar ósimdikterdi ósirýdiń 233 faktisi anyqtalǵan. Tárkilengen 10 tonnadan astam esirtki zattarynyń ishinde 8,5 tonna marıhýana, 65,6 kg gashısh, 60,2 kg sıntetıkalyq esirtki, 764 gramm geroın bar. IIM ókili «Qarasora» kezinde jalpy salmaǵy 8 tonna soranyń 12,9 myńnan astam butasy tabylyp, joıylǵanyn da habarlady.