«QTJ» UK» AQ basqarma tóraǵasynyń birinshi orynbasary Qanat Álmaǵambetov Pavlodar oblysy Ekibastuz qalasyndaǵy temir jol salasynyń jumys isteýin qamtamasyz etetin kásiporyndardyń jumysymen tanysty. О́ńirde temir jol kóligi úshin ónimniń keń spektrin shyǵaratyn temir jol klasteri quryldy. Ulttyq kompanııa otandyq óndirýshige qoldaý kórsetýde.
Birinshi nysan «QTJ» UK» AQ enshiles kompanııasy «Qaztemirtrans» AQ úshin 1 myń ashyq vagondy daıyndaý jáne jetkizý mindetin tabysty oryndaǵan «Qazaqstan vagon jasaý kompanııasy» JShS óndiristik alańy boldy.
– Osyndaı qysqa merzim ishinde aıyna 150 jartylaı vagon shyǵarýdy jolǵa qoıýǵa bolatynyna sengender qatary az boldy. Bul – úlken jetistik. Qazaqstan ekonomıkasy qarqyndy damýyn jalǵastyryp, zamanaýı kásiporyndar iske qosylyp, jańa ken oryndary ázirlenýde, sondyqtan aldaǵy 3-5 jylda jartylaı vagondarǵa degen qajettilik tek arta túsedi, – dedi Q.Álmaǵambetov.
Aıta ketý kerek, bul joba memleket qoldaýymen júzege asyryldy. «Báıterek» UBH» AQ jáne «О́nerkásipti damytý qory» AQ bıyl temir jol muqtajy úshin 1 myń jartylaı júk vagonyn óndirýge jáne jetkizýge 23,3 mlrd teńge bóldi.
Jańa ashyq vagondar temir jol ýchaskelerine bólindi: Jańa-Qaraǵandy-Brest – 325, Jomart-Kavkaz – 65, Shubarkól-Lýjskaıa – 200, Shubarkól-Vyshesteblınskaıa – 200, Qyzyljar-Elektr stansasy – 65 jáne Qorjynkól-Elektr stansasyna 145 birlik.
– «Qaztemirtrans» AQ parki jańa jyljymaly qurammen tolyqty. Bul rette, jańa ınnovasııalyq vagondardyń jóndeý aralyǵynyń ulǵaıýy óte yńǵaıly, – deıdi «Qaztemirtrans» AQ tasymaldaýdy qamtamasyz etý departamentiniń dırektory Nurlan Esembaev.
Sonymen qatar, Q.Álmaǵambetov Ekibastuzda ornalasqan Railways Systems KZ JShS kompanııalar tobynyń nysandaryn aralady. «Prommashkomplekt» JShS-da temir jol dóńgelekterin óndirýdegi jaǵdaı týraly aıtyldy. Eger 2019 jyly 53 myńǵa jýyq dońǵalaq shyǵarylyp, jóneltilse, 2020 jyly – 154 myń, al bıyl shamamen 120 myń dóńgelek shyǵaryldy. О́nim Qazaqstan boıynsha da, shetelderge de qoıylady.
Al RWS Wheelset JShS-da temir jol osteri men dóńgelek juptary shyǵarylady. Osy jyly kásiporyn Petropavldaǵy «ZIKSTO» AQ úshin 10 myń dóńgelek juptaryna jáne «Qazaqstan vagon jasaý kompanııasy» JShS úshin taǵy 4 myń dóńgelekke tapsyrys berdi.