QR Densaýlyq saqtaý mınıstrligi sanıtarlyq-epıdemıologııalyq baqylaý komıtetiniń resmı ókili Erjan Baıtanaev halyqty koronavırýs ınfeksııasyna qarsy vaksınalaý jumystary týraly aıtyp berdi, dep habarlaıdy Egemen.kz.
«Qazirgi ýaqytta respýblıka boıynsha koronavırýs ınfeksııasyna qarsy vaksınalaýdy uıymdastyrý jáne júrgizý jumystary jalǵasýda. 2021 jylǵy aqpannan bastap óńirlerge 18,5 mln astam vaksına dozasy jetkizildi, onyń ishinde I komponentke 9,4 mln doza jáne II komponentke 9,1 mln doza vaksına bar. Ázirge respýblıka boıynsha birinshi komponentpen – 7 884 798 adam egildi, ıaǵnı tıisti kontıngenttiń 79,1%-y qamtyldy, ekinshi komponentpen 6 942 756 adam (69,6%) vaksınalandy», dep málimdedi Erjan Baıtanaev.
Onyń aıtýynsha, QR Densaýlyq saqtaý mınıstrligi jergilikti atqarýshy jáne múddeli memlekettik organdarmen halyqty koronavırýs ınfeksııasyna qarsy ımmýndaý jónindegi keshendi jospardy ázirlep, maquldady. Ol koronavırýsqa qarsy vaksınalaýdy uıymdastyrý, halyqaralyq tájirıbeni zerdeleý, profılaktıkalyq ekpelerdi esepke alýdy sıfrlandyrý jáne halyqpen vaksınanyń mańyzy týraly kommýnıkasııalyq jumysty qamtıdy.
«Keshendi jospar Qazaqstan Respýblıkasy aýmaǵynda koronavırýs ınfeksııasynyń paıda bolýy men taralýyna jol bermeý jónindegi vedomstvoaralyq komıssııanyń 2021 jylǵy 9 aqpandaǵy hattamasymen bekitilgen. Búgingi kúni Keshendi jospardyń barlyq tarmaqtary oryndaldy. KVI-ǵa qarsy vaksınamen qamtý boıynsha Qazaqstan TMD elderi arasynda 2-shi jáne álemniń barlyq elderi arasynda 42-shi orynda tur. Qazaqstanda 9,9 mln adamǵa bes túrli vaksına dozalary qoljetimdi. Dúnıejúzilik densaýlyq saqtaý uıymy osy ınfeksııaǵa qarsy jyl sońyna deıin halyqtyń 40%-dan astamyn jáne 2022 jyly 70%-yn vaksınamen qamtýdy usynady», deıdi E.Baıtanaev.