Elimizde Memleket basshysy Qasym-Jomart Toqaevtyń bastamasymen «Taza Qazaqstan» ekologııalyq aksııasy ótip jatqaly eki jyldan asyp barady. Jurt bolyp jumyla atqarǵan jumys osy kúni shyn máninde eldik sıpat alyp úlgerdi, dep habarlaıdy Egemen.kz.
Jýyrda oblys ákimi Berik Ýálı óńir turǵyndaryna arnaıy beıneúndeý jasap, jalpyóńirlik tazalyq aksııasyna belsendi qatysýǵa shaqyrǵan bolatyn.
«Abaı oblysy – uly tulǵanyń atymen atalǵan, tarıhy tereń, tabıǵaty kórkem óńir. Bul – bizdiń ortaq úıimiz. Ony taza, jaıly, kórikti etip ustaý – árqaısymyzdyń azamattyq boryshymyz. Toǵyz joldyń torabynda boı kóterip, aımaqtyq kólik-logıstıkalyq habqa aınalyp kele jatqan Semeıimizdiń geografııalyq oryny bizge úlken múmkindik bergenimen, zor jaýapkershilik te artary belgili. Aımaq ekonomıkasy, óneri men mádenıeti, ekologııasy men tazalyǵy – bárimizge ortaq. Al tazalyq degenimiz – aıyna bir ret senbilikke qatysý emes, bul – bizdiń óńirde kúndelikti daǵdyǵa aınalyp, salt bolyp qalyptasýy tıis úlken mádenıet. Osyny eskere otyryp, biz byltyr sáýirde «Taza Qazaqstan» baǵdarlamasy aıasynda oblysymyzda jalpyóńirlik senbilik bastaǵanbyz», dedi aımaq basshysy.
Rasynda, sonyń nátıjesinde tazalyq naýqandaryna byltyr óńirde 349 myńnan astam turǵyn atsalysyp, 52 myń tonna qoqys shyǵaryldy. Kógaldandyrý jumystarynyń nátıjesinde 70 myńnan astam kóshet egildi. Ǵaryshtyq monıtorıng arqyly anyqtalǵan 191 ruqsat etilmegen qoqys oryndary joıyldy. Osy ıgi isterdiń zańdy jalǵasy retinde oblysta 10 aýdanynda «Úlgili aýyl» baıqaýyn ótkizgen. Aýyldyń ınfraqurylymyn jaqsartý men tazalyǵyn saqtaý jumystaryna qatysyp, belsendilik tanytqan 20 aýylǵa 20 traktordyń kilti berilgenine kýá bolǵanbyz.
Alaıda áttegen-aılar da joq emes. Jaýyrdy jaba toqymdap, jaramyzdy jasyra bergen de bolmas. Kúni keshe Úrjar aýdanda bolǵanymyzda osyndaı jaıttarǵa tap bolǵanymyz bar. Jyl saıyn dástúrge aınaldyrǵan oblys ákiminiń úndeýine ún qosyp, týǵan jerdiń tazalyǵyna salǵyrt qaraıtyn eldi mekendi kórip, qaradaı qarnymyzdyń ashqany bar. Basqasyn aıtpaǵanda, aýdan ortalyǵynyń negizgi kóshelerinde tazalyq talaby saqtalmaǵan. Qulaǵan kári terektiń dińderi, shashylǵan plastık qutylar, temeki tuqyly jáne qoqys jáshikteriniń de aınalasy shashylyp jatqanyn kórdik.
Osyǵan baılanysty aýdandyq ákimdikten mán-jaıdy surap kórgenbiz. Aýdandyq TÚKSh, jolaýshylar kóligi jáne avtomobıl joldary bóliminiń basshysy E. Jumashevtyń bergen málimetinshe, «Taza Qazaqstan» ekologııalyq baǵdarlamasy aıasynda Úrjar aýdanynda sanıtarlyq tazalyq, kógaldandyrý jáne abattandyrý jumystary júıeli júrgizilip keledi eken. Bıyl kóktemnen beri aýdan kóleminde birneshe senbilik uıymdastyrylyp, oǵan eldi meken turǵyndary, kásipkerler men mekeme qyzmetkerleri belsendi qatysqan. Nátıjesinde júzdegen tonna qatty turmystyq qaldyq shyǵarylyp, kóshetter otyrǵyzylyp, aryqtar men qoǵamdyq oryndar tazartylǵan. Sonymen qatar zańsyz qoqys tógý oryndaryna eskertý taqtaıshalary men beınekameralar ornatylǵan.
«Sondaı-aq Úrjar aýylynda jańa turmystyq qatty qaldyqtar polıgonynyń jobalyq-smetalyq qujattary ázirlenip jatyr. Buǵan qosa, aýdanda qatty turmystyq qaldyqtardy shyǵarýmen aınalysatyn «Taza Úrjar» JShS jumysyn bastap, turǵyndarǵa qyzmet kórsete bastaǵan», deıdi bólim basshysy.
Onyń bergen málimetinshe, bıyl 30 sáýirde senbilik ótken, oǵan 130 adam qatysqan, 43 tonna qoqys shyǵarylǵan, 600m aryq tazalanǵan, 6 dana tehnıka tartylǵan. Iаǵnı qaǵazda bári «qanttaı», al kórinis kóńil kónshiterlik emes ekenin biz túsirgen fotosýretterden baıqaýǵa bolady.
Abaı oblysy, Úrjar aýdany