QR Densaýlyq saqtaý mınıstri Alekseı Soı elimizde revaksınasııa qalaı uıymdastyrylatynyn túsindirdi, dep habarlaıdy Egemen.kz.
«Densaýlyq saqtaý mınıstrligi Qazaqstan Respýblıkasynyń halqyn ımmýndaý jónindegi konsýltasııalyq komıssııamen birge halyqty qaıta vaksınalaýdyń tásilderin pysyqtady. Halyqaralyq tájirıbeni eskere otyryp, koronavırýs ınfeksııasyna qarsy vaksınalaý sharasynyń tolyq kýrsyn ótkennen soń, 6-9 aıdan keıin qosymsha dozasyn egý usynylady. Onyń ózinde vektorly vaksına alǵan tulǵalarǵa 9 aıdan keıin ınaktıvti vaksına egý, ınaktıvti (Sinopharm, CoronaVac, Hayat-Vax, QazCovid-in – red.) vaksına alǵan tulǵalarǵa 6 aıdan keıin vektorly ekpe salý kózdelip otyr.
«MRNK-vaksına» (Pfizer – red.) alǵan tulǵalarǵa 6 aıdan keıin ınaktıvti nemese vektorly ekpe salynady. Sondaı-aq, birizdi ekpe túrin salý arqyly qaıta vaksınalanýǵa jol beriledi», dedi Alekseı Soı Ortalyq kommýnıkasııalar qyzmetinde ótken brıfıngide.