Baızaq aýdanynda áskerı qoımadaǵy jarylystan keıin zardap shekken 35 úıdiń 24-i tolyǵymen qalpyna keltirilip, paıdalanýǵa berildi, dep habarlaıdy Egemen.kz.
Onyń ishinde 4-eýi - Úshbulaq aýylynda, 12-si - Jibek joly aýylynda, 8-i - Qaınarda. Qalǵan 11 úıdiń jumysy qarasha aıynda aıaqtalady.
Oblys ákimi Berdibek Saparbaev Qaınar aýylyndaǵy jumys barysymen tanysyp, jergilikti turǵyndarmen áńgimelesti.
Birlik kóshesiniń turǵyny Erjan Aıdarqulov jóndeýden ótken úıdiń odan da jaqsara túskenin atap ótti.
«Sol kúni bizdiń úıimiz qatty zardap shekti. Jarylystan keıingi úshinshi kúni qurylysshylar kelip, turǵyn úıimizdi qalpyna keltirý jumystaryn bastady. Búgin biz qaıtadan úıimizge oralamyz. Qýanyshta shek joq. Úıge taza aýyzsý tartyldy. Buryn bizde gazben jabdyqtaýǵa qosylýǵa qarjylyq múmkindik bolmady. Qazir bizdiń úıde kógildir otyn bar. Bizdiń sharýashylyq qurylystarymyzdy, qorshaýymyzdy qalpyna keltirdi. Biz turǵyndarǵa, el men óńir basshylyǵyna qıyn sátterde kórsetken qoldaýy úshin alǵysymyzdy bildiremiz», dedi Aıdarqulov.
Amangeldi Nádirbekov pen Ashat Mámbetov te úıleriniń jańa kelbeti úshin alǵystaryn bildirdi.
Zardap shekken 12 kásipkerlik nysannyń 3-i qalpyna keltirilip, óz jumysyn qaıta bastady. Taǵy 9 nysanda qurylys jumystary qarqyndy júrgizilýde.
Barlyq qalpyna keltirilgen úılerdiń biryńǵaı sáýlettik stıli bar. Irgetasy men tóbesi qyzyl túske boıalǵan, negizgi korpýsy qyzǵylt-sary.
Qaınar aýylynyń kósheleri jaryqtandyryldy. Eger buryn tek ortalyq jol asfalttalǵan bolsa, qazir aýyldyń barlyq kósheleri asfalttalǵan.
«Oblys ákimine halyqty barynsha áleýmettik qoldaýmen qamtamasyz etý tapsyryldy. Bul turǵyda áleýmettik osal otbasylardyń úılerin gazdandyrý boıynsha jumystar júrgizilýde, ortalyqtandyrylǵan sýmen jabdyqtaý máselesi tolyq sheshildi. Sonymen qatar, zardap shekken árbir otbasyǵa bizdiń tarapymyzdan 300 myń teńge, kásipkerler tarapynan – 200 myń teńgeden, árbir oqýshyǵa – 50 myń teńgeden kómek kórsetildi. «Senim Baızaq» qoryna túsken qarajat esebinen aýyl turǵyndarynyń sharýashylyq qurylystary qalpyna keltirilýde», dedi Baızaq aýdany ákiminiń orynbasary Qaırat Ismaıl.
Qurylys jumystaryna 12 merdigerlik kompanııa, 200 jumysshy men 22 tehnıka jumyldyryldy.
Oblys ákimi qarashaǵa deıin qalǵan 11 turǵyn úıdi qalpyna keltirý jumystaryn aıaqtaýdy tapsyrdy.
Sonymen qatar, Berdibek Saparbaev Jibek joly aýylyna baryp, 150 oryndyq mekteptiń qurylysymen tanysty. Jumysshylar eki qabatty ǵımarattyń irgetasyn salyp, birinshi qabattyń qabyrǵalaryn salýǵa kiristi.