Ortalyq kommýnıkasııalar qyzmetinde ótken brıfıngte Ishki ister mınıstriniń orynbasary Sáken Sársenov ishki ister organdaryn sıfrlandyrý boıynsha atqarylyp jatqan jumystar jóninde jan-jaqty aqparat berdi. Elimizdegi eń iri vedomstvonyń kóptegen qyzmetteri elektrondy formatqa kóshirilgenin sóz etken ol sıfrlandyrýdyń polısııa men halyq arasyndaǵy baılanysty, mınıstrlik pen ózge memlekettik organdardyń ózara is-qımylynyń tıimdiligin arttyra túsetinin atap ótti.
Brıfıng basynda quqyq buzýshylyqtar boıynsha sıfrly málimetter bazasynyń qurylǵanyn habarlaǵan IIM ókili aıyppuldar týraly elektrondy habarlamalar júıesiniń iske qosylǵanyn, bul júıeniń basqa memlekettik organdarmen biriktirilgenin de málimdedi. «Bul atqarylǵan jumystardyń bir bóligi ǵana. Biz eń aldymen memlekettik qyzmetterdi sıfrlandyrý kezinde halyqtyń polısııamen tikeleı baılanysyna basa mán berdik. Osynyń arqasynda azamattar endi polısııa qyzmetkerleriniń jumys rejimine táýeldi emes. Iаǵnı olar qajetti qyzmet túrin ózderine yńǵaıly kez kelgen ýaqytta ala alady», degen S.Sársenov búginde IIM-nde 40 qyzmettiń 38-i tolyq avtomattandyrylǵanyn habarlady. Bul IIM qyzmetterin alýan túrli jolmen alýǵa múmkindik berdi. Mysaly, jyl bastalǵaly beri Halyqqa qyzmet kórsetý ortalyqtaryna 500 myńnan astam adam tirkelse, portalǵa 800 myńnan astam adam júgingen. Aqparattyq júıelerdi biriktirýdiń arqasynda memlekettik organdar da kóptegen qujattardy bazadan ala alady.
Halyq arasynda eń kóp atqarylatyn qyzmettiń biri – kólik quraldaryn tirkeý (jyl saıyn 2,5 mln tirkeý) bolsa, ekinshisi – júrgizýshi kýáligin alý (jyl saıyn 1 mln qujat). Ishki ister mınıstri orynbasarynyń aıtýynsha, buryn ár qyzmetke shamamen 6 saǵat ýaqyt ketetin. «Onyń ústine qyzmet kórsetý sapasy men senimdiligine qatysty syn kóp aıtylatyn. Sol sebepti de 2012 jyldan bastap 16 oblys ortalyǵynda mamandandyrylǵan Halyqqa qyzmet kórsetý ortalyqtary ashylyp, mundaǵy qyzmet kórsetý ýaqyty 1,5 saǵatqa deıin qysqardy», deıdi mınıstrlik ókili.
«Bul rette polısııa qyzmetkerleriniń, qyzmet alýshylardyń jáne halyqqa qyzmet kórsetý ortalyqtary mamandarynyń ózara baılanysy múldem alynyp tastaldy. Polısııa tek qujattardyń elektrondy kóshirmeleriniń tolyqtyǵyn rastap, sotty bolǵan-bolmaǵany jónindegi aqparatty tekseredi. Bul sondaı-aq qyzmet kórsetý kezinde sybaılas jemqorlyq táýekelderin joıýǵa múmkindik berdi», deıdi S.Sársenov. Jol qozǵalysy salasyn sıfrlandyrýdyń basty eki baǵyty – memlekettik qyzmetterdiń sapasy men qoljetimdiligin arttyrý ekenine erekshe toqtalǵan spıker: «Qazir júrgizýshi kýáligin onlaın rejiminde alýǵa nemese aýystyrýǵa bolady. Sonymen qatar ótken jyly árbir oblys ortalyǵynda ornatylǵan arnaıy mashınalar memlekettik nómirler men onyń kóshirmesin jasaýǵa ketetin ýaqytty 5 kúnge deıin qysqartýǵa múmkindik berdi. Osydan eki jyl buryn elimizde osyndaı eki mashına ǵana bolǵandyqtan, nómirlerdi 20-25 kún kútýge týra keletin», dedi.
Onlaın qyzmetterdiń eń tanymal túriniń biri – avtokólikti satý jáne qaıta tirkeý. Qazirgi tańda memlekettik qyzmettiń bul túri de Kaspi bank mobıldi qosymshasy arqyly kórsetiledi. Mobıldi qosymshada eldegi barlyq qaıta tirkeýdiń tórtten bir bóligi, naqtyraq aıtqanda táýligine 2,5 myń tirkeý jasalady eken. Qazir bul qyzmet Halyk bank, Eurasian bank, Freedom Finance sekildi taǵy úsh qarjy uıymynyń mobıldi qosymshalaryna engizilgen. Sondaı-aq 102-qosymshasynda iske asyrylady.
Brıfıng barysynda Sáken Sársenov, sondaı-aq halyqqa qyzmet kórsetý ortalyqtarynda sheteldikterge biryńǵaı qyzmet kórsetý sektorlary qurylatynyn habarlady. IIM ókiliniń habarlaýynsha, jyl saıyn elimizge shamamen 1,5 mln sheteldik keledi. Al ótken jyldyń 1 qańtarynan bastap olarǵa kóshi-qon polısııasynda ýaqytsha tirkeý týraly qoıylatyn talaptar alynyp tastaldy. «Búginde kóshi-qon polısııasyna e-Qonaq júıesi nemese mobıldi qosymshasy arqyly kelgen sheteldik qonaqtar týraly habarlaýǵa bolady. Elorda men Almaty qalasynyń Halyqqa qyzmet kórsetý ortalyqtarynda sheteldikterge ýaqytsha turýǵa ruqsat berý jáne vıza berýge shaqyrýlardy kelisý úshin biryńǵaı qyzmet kórsetý sektorlary quryldy», degen vedomstvo ókili bul qyzmet túrleri jyl sońyna deıin elimizdiń barlyq Halyqqa qyzmet kórsetý ortalyqtaryna engiziletinin de aıtyp ótti. Ishki ister mınıstriniń orynbasary búginde elimizde 13 myńnan astam kamera ornatylǵanyn, olardyń kómegimen jol qozǵalysy erejelerin buzýdyń 40 paıyzdan kóbi avtomatty rejimde anyqtalatynyn, bul júıelerdi engizý jol qozǵalysyna qatysýshylardyń tártibin túzep qana qoımaı, jol-kólik oqıǵalary sanyn tómendete túskenin de málimdedi. Al jyl basynan beri beınebaqylaý kameralarynyń kómegimen el kóleminde 10 myńǵa jýyq qylmys ashylǵan.
S.Sársenov bilim berý mekemelerinde ornatylǵan kameralardyń barlyǵy jyl sońyna deıin IIM Jedel basqarý ortalyqtaryna qosylatynyna da erekshe toqtaldy. Onyń málimdeýinshe, qazirgi tańda 2 026 mekteptegi 36 657 kamera JBO-ǵa jalǵanǵan. Elimizde 7 372 mektep bar bolsa, onda 137 myńnan astam beınekamera ornatyl- ǵan.