«Sıfrlyq transformasııa jáne jańa ómir sapasy» taqyrybynda OPEN MIND ashyq ınnovasııalar onlaın-forýmy jumysyn aıaqtady.
Forým sessııalarynyń taqyryptary koronavırýs pandemııasy kezinde búkil álemde bolyp jatqan jedeldetilgen sıfrly transformasııa baǵytyna arnaldy.
О́zekti máselelerdi talqylaýǵa el Úkimeti, korporatıvtik sektor, sarapshylar qaýymdastyǵy ókilderi, sıfrly qyzmetterdi sheteldik ázirleýshiler, IT-kompanııalardyń basshylary jáne t.b. tulǵalar qatysty.
Forým sessııalary barysynda «Ashyq ınnovasııalar men jańa sıfrlyq shyndyqtyń mindetteri», «Sıfrlandyrý jáne quqyq: jańa synaqtar», «Qazaqstandyq startaptar syrtqy naryqqa qalaı shyǵady?», «Aýtsorsıng. Qazaqstan», «Qazaqstandyq ýnıversıtetter qalaı jańa tehnologııalyq jobalardyń paıda bolý alańyna aınalýy múmkin?» degen taqyryptar talqylandy.
Forým kezinde Nursultan Nazarbaev qory uıymdastyrǵan KazRoboProject-2021 robottehnıka baıqaýynda jáne Smart Zholy hakatonynda jeńimpaz bolǵandardyń esimi anyqtaldy. Bul forýmnyń mańyzdy bólimi boldy. Jyl saıyn robottehnıka boıynsha chempıonat (10 jastan 21 jasqa deıingi jastar arasynda ótkiziledi) elimizdiń barlyq aımaqtarynan ondaǵan jas ónertapqyshtardy anyqtaıdy. Smart Zholy baǵdarlamasy perspektıvaly IT-startaptardy qoldaýǵa, olardyń úzdikterin halyqaralyq deńgeıge shyǵarýǵa baǵyttalǵan. Baǵdarlama jeńimpazdary birneshe jyldan beri Sıngapýrdegi Ońtústik-Shyǵys Azııadaǵy eń iri startap alańynda óz jobalaryn usynyp keledi.
KazRoboProject-2021 baıqaýynyń «Konsept» nomınasııasy boıynsha 10 jastan 15 jasqa deıin – Trashbot jobasy bar Jylyoi tehnik komandasy úzdik dep tanyldy. Bul sýdaǵy qoqysty jınaýǵa arnalǵan qurylǵy. Ol júzip júrip konteınerde plastmassany jáne basqa qalqymaly qoqystardy jınaıdy. Bul modelde prosesti avtomattandyrý elementteri, datchıkter men aqparatty berý qurylǵylary bar. Al 16 men 21 jas aralyǵynda – Eco-Robot jobasy boıynsha Team Atom komandasy tańdaldy. Bul robot qala kóshelerindegi qoqysty oflaın rejimde jáne kamera men ınternetti qoldana otyryp basqarý arqyly joıady. «Prototıp» nomınasııasy boıynsha 10-15 jas aralyǵynda – «Aqyldy Terminal» jobasyn daıyndaǵan Smart-TOP komandasy jeńiske jetti. Olar mekemeniń kire berisine ornalastyrýǵa bolatyn, dene temperatýrasyn ólsheıtin, antıseptıkalyq zattar shashatyn jáne kelýshilerge maska taratatyn termınal oılap tapty. 16 men 21 jas aralyǵynda «Kvantorıým» komandasy jeńimpaz retinde tanyldy. Bul komanda 18 650 akkýmýlıatordy avtomatty túrde zarıadtaýǵa arnalǵan stansa oılap tapty. Pavlodar kolledjiniń joǵary kýrs stýdentteri batareıalardy úlken kólemde úzdiksiz zarıadtaýǵa arnalǵan tolyq avtomattandyrylǵan keshen ázirledi. Batareıalar qurylǵyǵa konteınerden jetkiziledi. Batareıanyń zarıadtaýǵa jaramdylyǵy men polıarlyǵy tekseriledi.
Smart Zholy hakatonyna qatysýshylarǵa Qazaqstan Respýblıkasy Prezıdenti Is basqarmasynda ishki prosesterdiń tıimdiligin arttyrý úshin jańa sıfrly sheshimderdi qurý tapsyrmasy júktelgen bolatyn. Atap aıtqanda, bul mobıldi qosymshalar, zamanaýı tehnologııalar arqyly qoldanatyn baǵdarlamalyq sheshimder bolýy múmkin edi.
Hakatonǵa 35-ten astam qatysýshy ótinim jiberdi. Olardyń arasynan 5 komanda sheshýshi kezeńge ótti. Smart Zholy baıqaýynyń nátıjesinde «Automatico komandasy» jeńimpaz atandy. Komanda transport salasy úshin prosesterdi avtomattandyrý men almastyrýdyń tıimdi sheshimin qurdy.