ShQO boıynsha QAJD OV-156/15 mekemesiniń jedel bóliminiń qyzmetkerleri qarý-jaraq jasyrynǵan jerdi anyqtap, Semeı qalasynyń polısııa basqarmasynyń qyzmetkerlerimen birlese otyryp, jedel jumys júrgizdi. Jumys júrgizý barysynda Shyǵys Qazaqstan oblysynyń Borodýlıha tas jolynda Makarov qarýy jasyrylǵan qoıma tabyldy, dep habarlaıdy Egemen.kz.
«Semeı-Reseı shekarasy» avtokólik tas jolynyń 2 shaqyrymynda ornalasqan aýmaqty tekserý barysynda 9 mm Makarov tapanshasy men 7 dana oq tabyldy. Sonymen qatar, keısten granataǵa uqsaıtyn 1 dana kóleminde metall zat shyǵaryldy.
Tárkilengen zattardyń barlyǵy 37 jastaǵy Semeı qalasynyń turǵynyna tıesili ekeni anyqtaldy.
«Semeı qalasynyń DP qyzmetkerlerimen birlese otyryp, úılesimdi jedel jumys júrgizildi. Qyzmetkerlerimizdiń qyraǵylyǵynyń arqasynda nátıjeli ári ýaqytyly jumys atqaryldy», dedi jedel bólim bastyǵynyń orynbasary Jeńis Dáýrenbekov.
Atalǵan fakti boıynsha Qazaqstan Respýblıkasynyń Qylmystyq kodeksiniń 287-babynyń 3-bóligin basshylyqqa ala otyryp, (qarýdy, oq – dárilerdi, jarylǵysh zattardy jáne jarylǵysh qurylǵylardy zańsyz alý, berý, ótkizý, saqtaý, tasymaldaý nemese alyp júrý) boıynsha qylmystyq is qozǵaldy.