QR Eńbek jáne halyqty áleýmettik qorǵaý mınıstri Serik Shápkenov «Eńbek – eldiń muraty» arnaıy jobasy týraly aıtyp berdi, dep habarlaıdy Egemen.kz.
«Jalpyǵa Ortaq Eńbek Qoǵamyna qaraı» respýblıkalyq forýmynda sóz sóılegen Eńbek mınıstri eńbek qundylyǵy memlekettiń áleýmettik-ekonomıkalyq ósýi men halyqtyń ál-aýqatynyń basty quramdas bóligi ekenin atap ótti.
«Jyl basynan beri «Rýhanı jańǵyrý» baǵdarlamasy aıasynda bizdiń mınıstrlik «Eńbek – eldiń muraty» arnaıy jobasyn iske asyrýda, onyń maqsaty - qajyrly eńbektiń arqasynda jetistikke jetken adamdardyń bedelin arttyrý arqyly óskeleń urpaqtyń eńbekqorlyǵyn tárbıeleý. Arnaıy jobany sapaly júzege asyrý maqsatynda men naqty is-sharalar josparyn bekittim», dedi Serik Shapkenov.
Onyń aıtýynsha, búginde elimizdiń jalpy bilim beretin oqý oryndarynda eńbek ardagerleri men ótken jyldardaǵy «Eńbek joly» konkýrsynyń óńirlik kezeńderiniń jeńimpazdaryn tarta otyryp, «Seniń tańdaýyń» jumyspen qamtý sabaqtary ótkizilýde, kásiporyndar men óndiristerde oqýshylar úshin ashyq esik kúnderi uıymdastyrylýda. Teledıdar men áleýmettik jelilerde eńbek áýletteri, únemi jańa bilim men daǵdylarǵa úırenip júrgen adamdar, sondaı-aq Táýelsiz Qazaqstannyń qalyptasýyna eleýli úles qosqan adamdar týraly habarlar uıymdastyryldy.
«Memleket basshysy óziniń qyrkúıek aıyndaǵy Joldaýynda basty mindetterdiń biri jastardyń boıynda patrıotızm, bilimge umtylý, eńbeksúıgishtik, yntymaqtastyq jáne jaýapkershilik sııaqty jalpyadamzattyq qundylyqtardy darytý bolyp tabylatynyn atap ótti. Bul mindetti júzege asyrýda bizdiń jastarymyzben kúndelikti ómirlik tájirıbesi men kásibıligimen bólisetin aǵa urpaqqa, tálimgerlerge mańyzdy ról beriledi», dep atap ótti mınıstr.